CRÓNICA | Rueda promete para a Galiza "da próxima década" as mesmas receitas que nestes 15 anos

Case hora e media de discurso deulle a Alfonso Rueda para enunciar como ve a lexislatura. Único candidato á Presidencia do Goberno galego que se vota mañá no Parlamento, a súa "presentación do programa de Goberno" —como anunciou o presidente da Cámara, Miguel Ángel Santalices o seu discurso— permitiu a Rueda falar do pasado, do presente e do futuro. Da Galiza e de España, de eólicos e Altri (aínda que sen citala polo seu nome), de cambios competenciais na estrutura do Goberno galego, dos resultados das eleccións do 18-F e da "intransixencia" desa oposición que non entendeu "o veredicto electoral". Cun "seguirei sendo un humilde camiñante a carón do noso pobo", concluíu a súa intervención, só aplaudida desde as bancadas do PP. O "programa de Goberno" (Santalices dixit) que debullou Rueda tamén tivo tempo para eses anuncios que todo discurso de investidura debe contemplar. Neste foron axudas para nenos e nenas que vaian a clases de reforzo e actividades extraescolares; rebaixas nas herdanzas entre parentes —irmáns, curmáns, sobriños, cuñados, xenros e tíos—; que os autónomos que se dean de alta en 2024 non pagarán "nin 1 euro de cota"; e o anuncio, sorprendendo propios e estraños, da creación dunha dirección de Asuntos Constitucionais. Rueda reivindica a "Galiza que funciona" e avanza a creación dunha Dirección de Asuntos Constitucionais Mudanzas Agardábanse tamén anuncios e novidades sobre o novo organigrama do Goberno que vai constituír Rueda após a súa toma de posesión, mais o que houbo foron breves pinceladas: a investigación científica tomará un "novo pulo" pasando da Consellaría de Economía á de Educación; as competencias de Emigración dependerán de Emprego; a ordenación do solo industrial, até o de agora en Urbanismo (Medio Ambiente, Territorio e Vivenda) á Consellaría de Industria; e a tramitación normativa dos proxectos de enerxías renovábeis integraranse na de Medio Ambiente. Anunciou tamén, e sen profundar máis, maior protagonismo para "lingua e cultura". Porén, a maior parte da intervención desta terza do candidato dedicouse a atacar o Goberno estatal —e con el, dardos varios aos nacionalismos— e a defender a xestión do PP ao longo destes 15 anos do partido á fronte da Xunta da Galiza, con especial incidencia na "política industrial e enerxética". Sanidade, emprego ou economía, chaves no debate de investidura dun Rueda que promete gobernar "para todos os galegos" Aquí Alfonso Rueda cargou contra as "posturas populistas" que "intentan tombar todos os proxectos [industriais]" e que teñen como "inimigo" non "unha empresa concreta, senón o conxunto da industria galega". Non lle fixo falta mencionar a palabra Altri para que todos entendesen de que industria falaba. Nin explicar a quen cualificaba como "Confraría da Perpetua Negativa" polos seus "non a toda iniciativa empresarial". Non ficou aquí o presidente en funcións, que tamén aseverou unha defensa da política eólica da Xunta "no campo político e no xudicial", avanzando que "recorreremos" aquelas sentenzas do TSXG que tombaron proxectos eólicos. Promesas e datos "O desafío que temos ante nós nesta lexislatura é nin máis nin menos que a construción da Galiza da vindeira década", afirmou Rueda. Unha responsabilidade que, considera, o 18-F puxo en mans do PP como premio ás receitas destes 15 anos. Así, presumiu dos datos das listas de espera da Galiza —malia que a lista de agarda para se operar aumentou 21% en 10 anos—, ou da política fiscal da Xunta — a pesar de que a Galiza está no podio dos territorios onde menos pagan as persoas con ingresos máis altos—, e mesmo se gabou dos "avances" nestes anos en residencias para maiores —cando os propios expertos advirten de que a Galiza ten un déficit de 13.000 prazas—. Pontón ve "promesas enlatadas" e "cambios de cromos" para a Xunta no discurso "do día da marmota" O candidato tamén anunciou que van incorporarse psicólogos clínicos aos centros de saúde, cando actualmente e após 15 anos de gobernos do PP a Atención Primaria galega non conta con ningunha praza de Psicoloxía malia que 33% das persoas que requiren os servizos da médica ou médico de cabeceira fano por un problema de saúde mental. Igualmente, na súa intervención na mañá desta terza na Cámara comprometeuse a aumentar até 2028 o parque público galego de vivenda dos 3.800 inmóbeis actuais a 8.000. Unha cifra que sorprende —4.000 vivendas en catro anos—cando os datos referentes aos exercicios 2014 e 2022 —último ano con rexistros— indican que a Galiza só gañou 21 novas vivendas protexidas con destino a aluguer. "Escollamos profundar na convivencia harmónica", proclamou Rueda como guía para o seu mandato. "Non sería un bo presidente [da Galiza] se me desentendese do futuro de España", apuntou. Mañá será a quenda das intervencións do BNG, PSdeG e DO e da réplica de Rueda para, finalmente, procederse á votación. O sábado será o día da investidura do sexto presidente da Xunta da Galiza. Besteiro ve "decepcionante" o discurso de Rueda e di que os cambios na Xunta serán "cosméticos" BNG e PSdeG critican as "promesas enlatadas" Rueda non convenceu a oposición. A portavoz nacional do BNG, Ana Pontón, cualificou de "tremendamente preocupante" o contido do discurso de investidura do candidato do PP á Xunta porque "demostra que non ten ningunha idea nova" máis aló "das mesmas promesas enlatadas" ás que engade "cambios de cromos" na organización do Goberno galego cos que "esconder" a súa "falta de proxecto de país". Resume como o “día da marmota” a intervención de Alfonso Rueda e preguntouse “onde están os proxectos estratéxicos que precisa o país?”, para afirmar que a Galiza necesita “un Goberno que estea á altura dos retos que temos por diante no século XXI”. Oxea (DO) avanza a súa abstención á investidura de Rueda, a quen afea a "falta de compromisos" con Ourense Pola súa parte, o portavoz parlamentario do PSdeG, José Ramón Gómez Besteiro, cualificou de "moi decepcionante" o discurso e considerou que os cambios na estrutura do Goberno da Xunta só serán "cosméticos". Lamentou a falta de "impulso político" e de "ambición" mostrada polo candidato do PP nun discurso que, na súa opinión, centrouse en atacar o Goberno español. Por último, Armando Oxea, o deputado de Democracia Ourensá —que avanzou a súa abstención na votación de investidura de Rueda— dixo que foi "dos discursos máis plúmbeos que escoitei na miña vida".