O PSOE apura os contactos cos nacionalistas tras o fracaso de Núñez Feixoo na investidura

A investidura de Alberto Núñez Feixoo rematou en fracaso. O candidato popular non conseguiu onte os votos necesarios para ser proclamado presidente do Goberno do Estado español, sumando só os 172 apoios logrados na terza feira, procedentes de 137 deputados da súa formación, 33 de Vox, 1 de Coalición Canaria e 1 da Unión del Pueblo Navarro (UPN). Na súa contra situáronse o resto de formacións da Cámara Baixa, que lograron 177 apoios, achegados polas formacións progresistas de ámbito estatal e os nacionalismos de Catalunya, Euskal Herria e a Galiza, ao declararse nulo o formulado por equivocación polo deputado de Junts per Catalunya, Eduard Pujol. O candidato popular reiterou na sesión de onte os argumentos empregados polo Partido Popular desde a súa derrota electoral do 23 de xullo. Neste sentido, Núñez Feixoo fixo apoloxía do transfuguismo, apelando aos representantes socialistas a que “non sexan tránsfugas dunha España onde todos somos libres e iguais. Apéloos á conciencia. Se é a súa vontade seguir adiante será a súa responsabilidade, pero só a súa. Se a formación dun Goberno debe pasar pola distorsión dos principios constitucionais advírtoos que é máis decoroso. Amnistía si ou non? Non se pediu o consentimento para iso, comprometéronse en non facelo”. Alberto Núñez Feixoo ten un camiño moi complicado por diante. A curto prazo debe facer os axustes e renovacións orgánicas que lle reclaman os principais dirixentes da formación e enfrontar o debate sobre a posición a manter na investidura de Pedro Sánchez. Malia que o candidato popular avanzou un 'non' na investidura de Sánchez, algúns cadros da formación, como o deputado por Barcelona no Congreso Ignacio Martín Blanco ou a ex presidenta madrileña Esperanza Aguirre reclámanlle unha abstención a Feixoo, para que os socialistas non dependan dos nacionalismos para gobernar. Asemade, esta postura é coincidente coa mantida desde determinados círculos do capital. Feixoo, cuestionado O liderado de Feixoo está en cuestión. A este respecto, a maioría de dirixentes con peso na formación apostan por unha renovación na Presidencia do partido a mediados de lexislatura, pero consideran inaprazábeis mudanzas no núcleo duro da dirección. Neste caso, o groso das críticas diríxese contra os máximos responsábeis da área de comunicación do partido, Mar Sánchez-Sierra e Luis de la Mata, dúas persoas de máxima confianza de Feixoo na Galiza desde hai anos, a quen cuestionan a súa capacidade para dirixir a política informativa da formación e de relacionarse cos medios. Neste punto, son unánimes entre os profesionais da prensa madrileña as críticas a Sánchez-Sierra. A resposta ao candidato popular desde as filas socialistas chegou da man do deputado por Valladolid Oscar Puente. Este afirmou que “entrou vostede nesta Cámara sendo candidato a líder da oposición e, segundo as crónicas, vai saír convertido niso. Xa é vostede líder e azoute de Sánchez, a fonte de 'todo mal'. E nós que criamos que xa o era! O final do verán azul chegou e vostede partirá. Ninguén sabe até cando o seu liderado seguirá, o que é seguro é que o PSOE seguirá". Os tempos da investidura comezan a correr agora contra Pedro Sánchez. Unha vez que semella confirmado o apoio a esta candidatura dos deputados socialistas e de Sumar, o PSOE debe esforzarse para conseguir os votos das forzas nacionalistas de Catalunya, Euskadi e a Galiza. A este respecto, os contactos mantidos entre estas formacións e os socialistas desde o pasado mes de xullo serviron para achegar posturas en diversos aspectos; porén, as diferenzas seguen sendo importantes. Neste sentido, as diverxencias de máis alcance xiran ao redor da amnistía para as cidadás e os cidadáns cataláns perseguidos en relación co referendo de outubro de 2017 e da concreción do dereito a decidir. O camiño de Sánchez Pedro Sánchez ten por diante unhas semanas moi complicadas. Á marxe das resistencias internas nas filas socialistas ao acordo cos nacionalistas, onde se agrupa o sector máis característico da "vella garda" do partido pero, tamén, dirixente territoriais con moito poder interno, o candidato socialista sabe que un pacto cos soberanistas de Catalunya, Euskadi e a Galiza non é do gusto dos poderes do Estado, comezando pola Coroa e seguindo polos militares e o poder xudicial, que podería continuar interferindo na acción do Executivo. Neste sentido, os principais apoios de Pedro Sánchez proceden das autoridades comunitarias, interesadas en resolver a situación en Catalunya. Sumar manifestouse moi crítica coas propostas de Feixoo. Nesta liña, a súa voceira, Marta Lois, dirixiuse ao candidato do PP para sinalar: “Teño que recoñecerlle que ten unha boa posta en escena, é vostede un bo mentireiro. Vostedes non poden formar Goberno porque España non é un país soberbio nin mentireiro, senón de xente digna e honrada e que pronto terá un Goberno como o que merece. O que necesita o noso país son máis dereitos e máis liberdades. Vostede non goberna porque está atado á extrema dereita. Quede coa súa soberbia e a súa rabia na oposición”. Porén, os responsábeis de Sumar teñen por diante a complicada tarefa de buscar un encaixe ás partes dentro da coalición. O BNG reprocha ao líder popular a súa "falta de compromiso coa Galiza" O portavoz do BNG no Congreso dos Deputados, Néstor Rego, espetoulle a Feixoo que “descualificou a todos, menos a Vox, claro, e perdeu a votación. Máis resumido aínda: chegou, falou e fracasou. Fracasou para todo o mundo, menos para a prensa amiga". Neste sentido, apuntou que "quen quixer o voto do BNG terá que se comprometer coa Galiza. Vostede non o fixo. Tamén niso fracasou. Nós, o BNG, continuaremos traballando para conseguilo". Rego explicou que “quen quixer o voto do BNG terá que se comprometer coa Galiza con máis investimentos, mellores infraestruturas, novos e mellores servizos ferroviarios, rexeneración das nosas rías, a resolución da crise industrial, máis políticas sociais, cun financiamento adecuado e o fortalecemento do autogoberno”. Nesta dirección, asegurou que “esquecer Galiza á hora de gobernar non é exclusivo do Partido Popular. Temos denunciado moitas veces que as forzas estatais, se as deixan, altérnanse na discriminación do noso país e que iso só muda cando o BNG as forza a facelo". O calendario electoral galego volveu pairar onte no Congreso dos Deputados. Nesta liña, o dirixente nacionalista sinalou a Feixoo que "non sei que lle parecerá ao señor Rueda, aínda que sabemos que se formou con vostede nunha escola de bos colonizados afeitos a obedeceren sempre Madrid, mais xa llo digo: non se admiten devolucións e estea tranquilo que do señor Rueda xa nos ocupamos nós. Teña claro que o BNG está pronto para enfrontar o desafío das eleccións galegas".