O PSdeG ourensán empraza o alcalde de Barbadás a devolver as actas e expulsa o ex edil denunciado por acoso
Álvaro Vila asegura que a gobernabilidade nesta localidade é "secundaria": "O primeiro é acompañar á vítima".
O PSdeG provincial de Ourense emprazou esta cuarta feira o alcalde de Barbadás (comarca de Ourense), Xosé Carlos Valcárcel, a asumir responsabilidades políticas e entregar as súas actas no Concello e a Deputación após coñecerse a denuncia dunha militante contra el por suposto acoso laboral despois de denunciar ser vítima de acoso sexual por parte dun ex edil desta localidade, que o partido anunciou onte que procedía a expulsar.
Nunha rolda de prensa, o secretario xeral provincial, Álvaro Vila, trasladou que o propio Valcárcel presentou a terza feira a súa renuncia á militancia, pero considerou que debe "asumir as responsabilidades políticas" adecuadas á situación, nun contexto no que o partido ten "tolerancia cero" co acoso. E é que o rexedor subliñou que non deixaría os seus cargos institucionais como alcalde e deputado provincial e pediu el a dimisión do propio secretario xeral do PSdeG, José Ramón Gómez Besteiro.
Ademais, Álvaro Vila informou que o ex concellerio, que dimitiu do cargo en 2024, seguía sendo militante tendo en conta que, conforme explicou, a dirección do partido non era coñecedora dos feitos que se lle atribúen. "A día de hoxe seguía como militante e abríuselle expediente para expulsalo inmediatamente do partido", sostivo.
O secretario provincial do PSdeG ourensán ofreceu na sede provincial unha comparecencia ante os medios na que narrou como o partido na provincia tivo coñecemento da denuncia contra o alcalde, a través da chamada o domingo da propia vítima. Ademais, explicou que a persoa informou de que comunicara os feitos a través da canle antiacoso habilitada do PSOE.
Segundo afirmou, a partir dese momento, comunicou os feitos aos distintos órganos do partido e reuniuse, tanto co denunciado, como coa denunciante, que trasladou os feitos tamén por escrito. Ademais, convocouse unha reunión da executiva provincial, na que se acordou subliñar o "rotundo apoio" ás vítimas destas condutas, ás que o partido quere "acompañar" no proceso.
Alvaro Vila, que subliñou os "valores" do PSOE de "tolerancia cero" ao acoso, asegurou tamén que se trata dun proceso interno "garantista" tanto para a persoa denunciante como para o denunciado.
