O deputado do PP no Congreso español, Francisco Conde, adiantou esta segunda feira en rolda de prensa que o grupo popular defenderá esta terza feira, na Comisión de Industria e Turismo, da Cámara Baixa unha proposición para "impulsar" o proxecto da fábrica que Altri quere instalar en Palas de Rei (A Ulloa) e así garantir a súa viabilidade.
Unha iniciativa, explicou, formulada para instar o Goberno estatal dirixido por Pedro Sánchez a "garantir o acceso aos fondos europeos" e a "construír a subestación eléctrica que precisa Altri para desenvolver o seu proxecto".
"É unha iniciativa para que o Goberno poida dar pasos concretos e aproveite esta enorme oportunidade para vertebrar o territorio creando máis de 2.500 postos de traballo directos e indirectos e abrindo oportunidades para o rural", explicou Conde.
"Diálogo" e "sensatez"
Neste sentido, o deputado popular no Congreso español apelou ao "diálogo" e a "a sensatez" para garantir a viabilidade dun proxecto que deberá cumprir, puntualizou, "todas as normativas ambientais e de impacto territorial".
