O PP criticou esta quinta feira o que cualificou de "nula independencia" do informe sobre Altri presentado polo Consello da Cultura Galega e pregúntanse, ademais, "que fai un órgano especializado en cultura valorando unha instalación industrial de tanta complexidade e envergadura".
Nun comunicado,o PP considera que o texto está "asolagado de opinións" de expertos que "se posicionaron claramente en contra do proxecto unicamente por motivacións políticas".
Acusan os "supostos especialistas" que redactaron o informe de mobilizarse "sempre en contra de Altri" e "como parte da órbita do BNG".
Para o Partido Popular galego, o informe do CCG "contrasta coa independencia dos funcionarios da Xunta, que analizan a proposta de forma rigorosa e atendendo só a criterios técnicos".
Precisamente, na mañá desta quinta feira a propia presidenta do Consello da Cultura Galega, Rosario Álvarez, xustificaba a pertinencia do informe ao ser o Consello un "órgano asesor consultivo", así estipulado desde o Estatuto de Autonomía, lembrou.
Tamén visto que o proceso leva "moito tempo entre a opinión pública, ás veces con opinións moi enfrontadas" e que se trata dunha instalación que podería ter afectacións, non só ambientais, senón tamén patrimoniais.
Así mesmo, explicou que para a elaboración do informe creouse expresamente unha comisión multidisciplinar cunha decena de expertos.
