A aposta da túa candidatura é dotarse dunha portavocía coral, con tres persoas a partillala, nengunha delas serás ti. Sorprende iso e sorprende tamén un chisco que non vaias ter dereito de voto na dirección.
Eu estou no Consello das Mareas, estou encabezando a lista, polo tanto, son membro de pleno dereito, con voz e voto, no Consello das Mareas e despois tamén, como voceiro do grupo parlamentar, son membro nato da Coordenadora [máximo órgao executivo da confluencia]. Teño voz plena na Coordenadora, si.
Pero non tes voto na Coordenadora.
Na Coordenadora, a día de hoxe non.
E a ti iso paréceche normal?
Bon, é unha forma de estar na dirección política, non? Desde logo a criación do espazo de confluencia require estabelecer novas formas de estar nos órgaos de dirección e esta é unha forma que adoptamos nós.
E como che queda o corpo, estás satisfeito con esta fórmula?
Ben, o importante é que o proxecto de confluencia teña futuro. Todos pomos da nosa parte para que todo vaia como ten de ir, cara á consolidación do proxecto, desde logo.
E hai percorrido para que esta cuestión de non teres direito de voto na dirección dalgunha maneira se corrixa?
A ver, non hai nada escrito sobre o tema do direito de voto, dise que estarei con voz e sen voto [no texto do Documento Político que apresenta a candidatura oficial a estas primarias], mais nada impide que puidese chegar a telo. En todo caso, as propostas que nós facemos desde a candidatura son propostas. Organicamente non hai ningún artigo que me prohíba estar na coordenadora con voz e voto, polo tanto é unha decisión que asumimos así na candidatura con vocación de que sexa de consenso, pero simplemente é unha proposta eleitoral [para o proceso das primarias].
A íntegra desta entrevista, unha dupla páxina, aparece no Sermos230, nos pontos de venda habituais e tamén na nosa loxa.
