O PP rexeita as emendas e avala en solitario a tramitación da lei que pon fin á CRTVG

En 2025 fanse 40 anos do inicio das emisións da radio e televisión galegas, un aniversario que o PP pretende celebrar aprobando unha nova lei para os medios públicos da Galiza que foi quen, nestes meses, de sumar o rexeite da oposición parlamentaria, a representación do cadro de persoal da CRTVG, dos sindicatos, as entidades de defensa do galego ou asociacións de xornalistas, entre outros. No obxectivo de aprobar esta lei o PP deu esta segunda feira—e deuno en solitario— un paso máis: avalou que continuase a tramitación parlamentaria deste proxecto, de lei denominado oficialmente De servizos dos medios públicos de comunicación da Galiza para a sociedade dixital, e que poría punto e final á CRTVG para crear a Corporación de Servizos Audiovisuais da Galiza (CSAG). O PP empregou a súa maioría para rexeitar as emendas de devolución presentadas polo BNG e o PSdeG, así como o texto alternativo que propuxo a formación nacionalista. O proceder dos populares nas votacións borrou as manifestacións feitas apenas minutos antes polo conselleiro de Presidencia, Diego Calvo, desde o estrado da Cámara, onde manifestou a "plena disposición ao consenso" por parte do PP en torno a este texto.

Dous son os motivos que partilla a oposición, non só parlamentaria, a este proxecto de lei: que "blinda" e "reforza" o control do Executivo galego sobre os medios públicos e que abre a porta a que o español entre e se asente neles, o que supón un torpedo contra un dos principios fundamentais que en 1985 se estabeleceron para a creación da radio e televisión galegas, a defensa e promoción da lingua e da cultura da Galiza. Nada diso semellaba preocupar esta segunda a Diego Calvo. Ante unha ringleira de cadeiras azuis baleiras —as que ocupan na Cámara os membros do Goberno galego—, que só se foi completando unha vez rematado o debate e cando se ía votar; o conselleiro da Presidencia dixo que esta lei "reforza a pluralidade nos medios públicos". Gabouse dun "proceso transparente e participativo" para facer este proxecto e defendeu que a "profunda transformación" dos medios dixitais obrigaban a elaborar unha nova norma. Ademais, enfatizou que a defensa do galego nos medios públicos "é innegociábel" e que esta garantida coa nova lei que se tramita. A principal entidade en defensa do galego, A Mesa pola Normalización Lingüística, considera, porén, que "abre a porta a que a televisión pública da Galiza abandone o uso do galego".

"É unha lei avanzada", concluíu Calvo, "unha lei que plasma as nosas conviccións galeguistas".

Rodil: "Toman por asalto os medios públicos"

"Esta lei nin é transparente, nin é plural, nin é participativa", afirmou no inicio da súa intervención Olalla Rodil (BNG). A deputada nacionalista dixo que o PP só ten un obxectivo con esta norma,  é "pór a dedo unha persoa que continúa a facer de correa de transmisión do PP nos medios públicos". Olalla Rodil engadiu, para alén deste, outros motivos polos que o BNG se opón a este proxecto: "Por vez primeira na historia da CRTVG" ábrese a porta a contidos en español e "fulmina" ferramentas participación como o Consello de Informativos ou o Estatuto Profesional. "Vostedes toman por asalto os medios públicos", enfatizou, afirmando que con este camiño "a CRTVG é cada vez máis TelePP". Neste sentido, a deputada informou dun estudo interno da propia compañía no que se recollía unha enquisa que sinalaba que 51,4% das persoas enquisadas crían que a información da CRTVG "non é plural".

O BNG defendeu un texto alternativo ao presentado polo Goberno galego. Propuña que os órganos de Goberno se elixisen por un proceso de concurso público "con criterios obxectivos e profesionais", así como crear un Consello que velase pola "imparcialidade e profesionalidade" no ente. "Presentamos este texto", explicou a deputada nacionalista, "para defender o servizo público e unha CRTVG ao servizo do pobo galego".

Pola súa parte, a deputada Silvia Longueira (PSdeG) expresou o rexeite o seu grupo a esta lei.

Longueira: "É un deliriode poder e control" 

"Esta lei é un delirio de poder e control", criticou a deputada socialista. O PP ao longo destes anos, aseverou Longueira, "transformou" os medios públicos galegos "nunha sucursal mediática do partido do Goberno galego". A socialista acusou os populares de "transitar a fina liña entre crueldade e desinformación" con este proxecto, e responsabilizounos de que os medios públicos galegos teñan unha "liña editorial tan plural como un monólogo".

Tareixa Navaza: "É unha aberración"

Mentres este debate se producía no pazo do Hórreo, ás súas portas unha concentración da plataforma Liberemos A Galega denunciaba esta nova Lei de medios. A histórica xornalista Tareixa Navaza exerceu de portavoz das concentradas para cualificar de "aberración total e absoluto" o proxecto defendido polo PP. "Tiran polo chan compromisos na fundación dos medios públicos galegos como os que ten coa lingua", criticou, e afirmou que o Partido Popular actúa como "trumpistas".

Tareixa Navaza afirmou que "unha porcentaxe altísima" da cidadanía galega "ten claro" que quere unha radio e televisión galegas "plurais" —"recollemos máis de 20.000 sinaturas contra esta lei"— e preguntouse "onde están os profesionais  [da prensa] de renome que andan por tantas tertulias á hora de defender estes medios?".

A folga cancela varios programas e altera a programación da TVG e RG

Folga de 24 horas na CRTVG convocada polo Comité Intercentros para mostrar o rexeitamento do cadro de persoal ao proxecto de lei de medios públicos que esta segunda se admitiu a trámite no Parlamento. "Non é que esta norma represente un retroceso, e que é unha tomadura de pelo", manifestou a Nós Diario, Raquel Lema, presidenta do Comité de Folga.

"Confiamos en que finalmente non se aprobe, porque xa advertimos agora que tal e como está, esta lei non vai traer a paz social á CRTVG, o que vai facer é agravar a situación", explica. Lema cualifica de "moi alta" a participación na folga, ao redor de 67%, e informa de que o paro cancelou programas como o Zig Zag, as emisións de deportes nos informativos da TVG e Radio Galega ou tamén O Termómetro. "Estamos satisfeitas coa convocatoria", indica. Explica a sindicalista que o Comité Intercentros, representación legal do persoal, remitiu aos tres grupos parlamentarios (PP, BNG e PSdeG) as súas propostas para a nova lei. "Propomos, entre outras cuestións, blindar a produción propia nos servizos de informativos e que se manteña e se cumpra o Consello de Informativos e o Estatuto Profesional". 

A compañía cifra en 33% o seguimento

Desde o Gabinete de Prensa da CRTVG, a preguntas de Nós Diario, cifran o seguimento da folga en 33,2% do cadro de persoal. " A afectación en canto a programas da Radio Galega: Pensando en ti e Diario Cultural. Na TVG : O Termómetro, que non se emitiu, e as seccións do Tempo e Deportes do informativo.