Nace a lei que limita dereitos sen estado de alarma

Dar "seguridade xurídica" ao Goberno para “xestionar” a pandemia leva reclamando con insistencia nos últimos meses o presidente da Xunta da Galiza, Alberto Núñez Feixoo. O Partido Popular apoiouse nese argumento para presentar a reforma da Lei galega de saúde de 2008 no Parlamento galego e esta terza feira, 23 de febreiro, a maioría absoluta que ten o PP na Cámara permitiu que a reforma saíse aprobada unicamente cos seus votos. Tanto BNG como PSdeG foron moi críticos co texto e votaron en contra. Restrición de dereitos As mudanzas de maior envergadura que implica a modificación da lei sanitaria teñen a ver coa posibilidade que se outorga á Xunta para obrigar á vacinación da poboación e de sancionar a quen se negue. Así mesmo, as autoridades sanitarias poderán adoptar medidas de obrigado cumprimento “cando exista ou se sospeite” dun risco grave para a saúde da poboación. Poderán suspenderse actividades, fechar de empresas, limitar capacidades de locais e impor horarios, obrigar ao uso da máscara, limitar o número de asistentes a reunións ou restrinxilas, limitar a mobilidade de cidadáns ou impor confinamentos perimetrais, ademais de permitir a incautación de material ou a intervención de residencias. A reforma da lei tamén prohibe o botellón: “Queda prohibido o consumo en grupo de bebidas alcohólicas na vía pública, parques e prazas públicas, e noutros lugares de tránsito público”. A lei sanitaria RECOLLE a obrigatoriedade da vacinación Contémplanse multas de até 60.000 euros por saltar confinamentos e inclúese un réxime de sancións de até 600.000 euros en tres niveis -leve, grave e moi grave- para penar o rexeitamento a vacinarse ou a someterse a probas diagnósticas, caso de as autoridades sanitarias estabeleceren a súa obrigatoriedade. Entre as infraccións leves figura non levar máscara (sanción dun mínimo de 100 euros, con posíbel incremento por incumprimento), infrinxir o recoller obrigatorio, reunirse con máis persoas das permitidas, participar en festas que incumpran restricións e desobedecer os límites de horarios de locais. Ademais, tal e como explicou a deputada popular Encarnación Amigo no pleno, a lei "prevé o illamento domiciliario e corentenas de contactos", e apostilou que o único límite na restrición de dereitos é "o respecto á dignidade das persoas". Dubidoso encaixe legal A deputada do BNG Iria Carreira alertou no debate parlamentar de que a lei supón unha "supresión de dereitos fundamentais coa escusa da pandemia". Conculcar dereitos fundamentais e liberdades públicas cunha lei ordinaria, en lugar de cunha lei orgánica ou cunha reforma constitucional, “é un disparate xurídico”, valorou o deputado socialista Julio Torrado, alertando do dubidoso encaixe legal da nova norma galega, ao tempo que a considerou innecesaria porque todo o que as medidas restritivas propoñen xa o poden efectuar as autoridades por medio do actual decreto de estado de alarma. Precisamente, BNG e PSdeG acusaron os populares de querer instaurar coa reforma sanitaria un "estado de excepción permanente", haxa pandemia ou non. Obriga vs concienciación O secretario xeral do PP, Miguel Tellado, cualificou no pleno de "negacionistas" os partidos da oposición por rexeitaren unha lei que permite obrigar á vacinación, ao que Carreira respondeu "que o comportamento da poboación galega está a ser exemplar" e "non é que a xente non queira vacinarse, é que non hai vacinas", criticou. De igual modo, sobre a obrigatoriedade de someterse a probas de diagnóstico, a nacionalista considerou que "o problema real" que non aborda a lei é a falta de medios, orzamento, recursos e contratación de persoal na sanidade pública. "Non recollen ningunha medida para reforzar a o sistema sanitario", dixo. De "salvar o Nadal" á nova lei O pasado mes de outubro, Núñez Feixoo enviou ao mandatario español, Pedro Sánchez, unha proposta para reformar a lei sanitaria estatal para xestionar a pandemia sen necesidade de estado de alarma. Feixoo cualificou daquela o estado de alarma actual -vixente até 9 de maio- e o recoller obrigatorio de "demoledores" para a economía de España ao "cargárense" a campaña de Nadal e a Semana Santa. Mais nin Sánchez nin o líder do PP, Pablo Casado, deron percorrido á proposta de Feixoo. Foi entón cando o presidente da Xunta optou por reformar a lei sanitaria galega para regular as accións que o Goberno galego pode tomar nunha pandemia "con seguridade xurídica". A ese respecto, a deputada Encarnación Amigo recordou no pleno que a reforma blinda a actuación da Xunta ante situacións como as vividas en Euskadi, onde o Tribunal Superior tumbou o decreto do lehendakari que impuña restricións de apertura á hostalaría. Lei de Reactivación Tamén o hemiciclo aprobou este 23 de febreiro a Lei de simplificación administrativa e de reactivación económica, e fíxoo de novo cos votos en solitario dos populares, que afirman que este texto lexislativo busca axilizar e facilitar a tramitación dos fondos europeos nos proxectos tractores, reducir burocracia e rebaixar impostos, especialmente en zonas rurais e despoboadas. A deputada Noa Presas (BNG), acusou o PP de permitir que nos procedementos de avaliación ambiental, se os informes non se emiten en prazo, pasen a ser positivos, algo que cualificou de “disparate” e un despropósito que considerou aínda maior tendo en conta que os informes, por medio desta lei, poderán ser derivados a entidades privadas que van suplantar a Administración. “Nun contexto de descontrol eólico con enormes problemas no territorio, vostedes empregan esta lei para pór alfombra vermella á instalación de megawatios de calquera maneira, cando a Galiza está dicindo eólica si, pero non así”. Begoña Rodríguez (PSOE) tamén cargou contra a lei por "obviar as bases para un cambio de estrutura produtiva na Galiza" e, ao igual que Presas, criticou que a pesar de a lei ter nacido no Consello do Goberno galego, for o PP e non a Xunta quen a rexistrou no Parlamento (facéndoo como proposición de lei pola vía de urxencia) para así axilizar o trámite e "saltar" a exposición pública e os informes preceptivos”, tanto da asesoría xurídica da Xunta como do Consello Económico e Social. Lei de Acción exterior E de novo, o PP ficou só na aprobación da Lei de acción exterior. Os socialistas criticaron que a norma afronte a política exterior con "inmobilismo", sen vocación de atraer investimento a Galiza e esquecendo que a diáspora galega mudou nos últimos anos, coa marcha de numerosas mozas e mozos de alta formación sen posibilidades de traballar na terra. A norma "conserva unha visión tutelada e subordinada a Madrid en vez de desenvolver o potencial propio do país", xulgou o BNG, que ve unha oportunidade perdida para pór Galiza no mundo. A protesta social chega ás portas do Parlamento Ducias de persoas manifestáronse diante do Parlamento contra a Lei de reactivación económica convocadas pola Coordinadora por un Reparto Xusto dos Fondos Next Generation. A norma, di a coordinadora, "afonda aínda máis na depredación do territorio", e fronte a iso exixe transparencia e participación da sociedade na toma de decisións e nos criterios de adxudicación nos proxectos industriais e empresariais que a Xunta candidate para obter financiamento dos fondos europeos de recuperación. Tamén piden a inclusión de estritos controis ambientais e sociais nos proxectos e chaman a priorizar a contratación para iniciativas estratéxicas de desenvolvemento local, así como a centrar os fondos "nunha verdadeira transición ecolóxica e na descarbonización da economía", para construír unha sociedade "máis resiliente fronte ao cambio climático". O colectivo ecoloxista Adega, integrante da coordinadora, alertou de que as empresas eólicas contan cunha "medida de graza excepcional" na Lei de reactivación: poder presentar proxectos fóra do plan sectorial, sempre que a criterio da Xunta teñan unha "clara incidencia territorial". Con esta disposición podería haber parques eólicos en até 88% do territorio galego. Acusan o PP de situar as eólicas por riba do territorio coa lei de reactivación A propia Adega e outras entidades, como a CIG, Fruga e o SLG participaron na mesma mañá doutra manifestación ante o Hórreo, neste caso contra a nova revisión do Plan forestal da Xunta por afondar na "eucaliptización". A idea do Executivo con este plan é eliminar en 2040 até 5% das máis de 420.000 hectáreas de eucaliptos actuais, de forma que 20.000 se convertan en masas doutras árbores. Pero de 2021 a 2025 esa superficie pode incrementarse até 3% sobre a actual cifra (unhas 12.000 hectáreas). No hemiciclo, o conselleiro de Medio Rural, José González, propuxo unha resolución para a suspensión temporal de novas plantacións de eucaliptos nas superficies en que non se plantou até o momento, polo que empraza a que se alcance unha transacción cos grupos da Cámara no vindeiro pleno, que terá lugar este 24 de febreiro. A oposición, pola súa banda, pide retirar o plan, ao favorecer o "monocultivo de eucalipto". Por último, decenas de negacionistas concentráronse tamén este 23 de febreiro ante o Parlamento galego en contra da reforma da Lei de Sáude. Ao igual que na mobilización negacionista do pasado sábado en Compostela púidose ver algúns manifestantes sen máscara ou con ela baixada.