Miguel Anxo Fernández Lores: "Algún día saberase que gaña o PP por defender que Ence siga na ría"

Explican a nova ofensiva de Ence as declaracións do seu presidente sobre un posíbel accidente na ría e as mobilizacións de parte do cadro de persoal? Eu diría que Ence leva moitos anos coa mesma ofensiva. Xa antes de Colmenares [actual conselleiro delegado da empresa], mantivera unha reunión co presidente anterior, Méndez. Fora moi claro e dixérame algo moi significativo: é máis fácil cambiar a opinión pública que trasladar Ence. Desde entón trataron de mudar a opinión pública co fin de manterse na ría de Pontevedra. Segue a ser a mesma estratexia e ten a ver coa compra de vontades, con presións e ameazas. A idea deles é perpetuarse na ría porque lles resulta economicamente rendíbel. De estratexia non variaron, quizais son agora máis agresivos. A inminente sentenza da Audiencia Nacional sobre a prórroga que alonga a concesión até 2073 pode aclarar a situación. Que agarda vostede ao respecto? Espero que se teñan en conta os argumentos que usou o concello e que son contundentes. Por un lado, non se pode facer unha concesión máis alá dos 75 anos, que se fan en 2033. Por outro, para que estea localizada nunha zona marítimo-terrestre hai que xustificar que non pode estar situada noutros sitios e iso non se cumpre, pois non é imprescindíbel que estea en terreo gañado ao mar nin en zona marítimo-terrestre unha fábrica destas características. Ademais, están as incomodidades que causa desde o punto de vista de impacto ambiental e paisaxístico, xa que se impide que a ría se desenvolva como sector primario e espazo natural de alta calidade. Eu espero que a sentenza recoñeza todo isto. Todo apunta a que a sentenza vai ir nesa liña e por iso eles están usando todos os mecanismos para que non sexa así. A Avogacía do Estado coincide agora co seu Goberno en que a prórroga concedida a Ence en 2016 para manterse na ría 2073 non se axusta a dereito por colidir coa Lei de costas e coa Lei de patrimonio. Como entende que o Goberno de Raxoi aprobara esta ampliación da concesión? O PP pactou con Ence hai xa algúns anos intentar por todos os medios que a fábrica permaneza na ría de Pontevedra sine die. O PP aceptou que Ence siga onde está a cambio de que a empresa mudase a política informativa, meter cartos teoricamente no saneamento da ría, que non meteu, e comprar vontades, porque hai un plan social de Ence. Todo iso está encamiñado a xustificar que a fábrica siga no sitio. Algún día saberase que gañou o que está gañando o PP con esa aposta de pactar a permanencia de Ence na ría. Hai un pacto entre o PP e Ence que ten a ver con que pasasen polo menos dúas persoas no Consello de Administración da empresa que foron cargos políticos destacados do PP, como Isabel Tocino [ministra de Medio Ambiente] e Carlos del Álamo [conselleiro de Medio Ambiente da Xunta], e algún director xeral, cobrando ademais uns salarios desorbitados para 12 reunións que teñen ao ano. Hai unha conivencia clarísima entre o PP e Ence. Falaba agora de comprar vontades. Tratou Ence de compralas entre o seu Goberno nalgún momento? Indirectamente, a través de terceiras persoas, hóuboas. Non comprar a vontade de ninguén en concreto, senón do concello. Falaban de dar o que fixese falta a cambio de que mudásemos de posicionamento. Eran moitísimos cartos. Nalgún momento falaban duns 500 millóns de pesetas para que se lles garantise a permanencia. Ence coñecía desde o momento da privatización, en 2001, que a concesión remataba en 2018. Por que en todo este tempo non deu ningún paso para buscar un novo emprazamento? Porque están moi a gusto onde están: teñen o porto ao lado, o eucalipto ao lado, condónaselle o canon da auga, que os concellos e todas as empresas teñen que pagar e polo que Ence aforra entre cinco e seis millóns ao ano, desfrutan de terreos públicos... iso é unha bicoca, unha especie de dereito de pernada. Queren quedar aí e para iso presionan a todos os niveis: conseguiron mudar a Lei de costas para non marchar en 2018, agora queren moldear ao seu gusto a Lei de cambio climático para saltar a data máxima de 75 anos de dominio público marítimo-terrestre. Lembremos que a Lei de patrimonio di que non pode haber unha concesión en dominio público de máis de 75 anos e a súa idea é esa. Xa non formulan outra cousa. Entón é unha posición firme. Dicían de montar unha fábrica en Portugal ou no Brasil, mais é incoherente. Se así fose terían que facer un investimento semellante ao que farían noutra localización da Galiza. Eles están loitando para que as autoridades competentes cedan e poidan manterse na ría. Esa é a súa formulación fundamental. Sempre terei a dúbida de se o Goberno estatal e a Xunta defendesen unha postura coherente, Ence formularía unha alternativa?, Mais como Ence ten un pacto co PP... Eles queren sacar o máximo beneficio posíbel e prefiren gastar diñeiro en comprar vontades que en facer un traslado. Nós entendemos a postura das e dos empregados, mais os traballadores e as traballadoras teñen que exixirlle á empresa que faga un proxecto alternativa nunha localización legal e consecuente coa recuperación da ría. Esa é a única garantía de manter os postos de traballo no futuro. Hai sitios de abondo onde localizar a fábrica e aí teñen que negociar con quen ten as competencias en ordenación do territorio, a Xunta, e co Estado. Ningunha empresa demanda as facilidades que piden estes señores. Cando aquí compraron a fábrica sabendo que a concesión concluía en 2018 e que tiñan que devolver os terreos, a compra estaba máis que amortizada. Ence declara uns beneficios de entre 40 e 50 millóns despois de impostos ao ano. Se multiplicas iso por 60 anos, é un "pelotazo" tremendo. Afirmou que sentira medo físico diante da tentativa de agresión por parte dun grupo de traballadores de Ence. Que opinión lle merece a actitude do presidente da Xunta ao respecto? Quedou clara na pregunta e na proposición que formulou Luís Bará [deputado do BNG] no Parlamento, eles non condenan este tipo de agresións verbais e non verbais. O problema é que cando se entra nunha dinámica deste tipo, é moi complicado, porque a xente perde os papeis. Estou completamente seguro de que o que fixeron ao longo do tempo foi coa autorización e a conivencia do PP e da propia empresa. Non dan un paso adiante se non hai autorización por parte de Colmenares [presidente de Ence], ao que imos declarar persoa non grata. Eses métodos non son de recibo. Feixoo defendeu publicamente manter a fábrica na ría, mesmo recoñecendo os custos electorais que podería provocarlle en Pontevedra. Ten iso a ver co pacto entre PP e Ence? Hai anos falouse da posibilidade de trasladar Ence a unha localización na propia comarca e o PP semellaba estar a favor, mais deuse ese pacto e de aí veñen as propostas que están facendo, o cambio de táctica, o plan social... todo para manteren a fábrica na ría. O PP de Pontevedra está estes días no albo tras as declaracións do ex tesoureiro do PP Luis Bárcenas e do ex xerente Cristóbal Páez, que apuntaron a pagos en diñeiro en negro. Sorpréndelle? Non sorprende. Sóubose que historicamente o PP contaba con financiamento extra e iso xa desde o Goberno de Fraga. De feito, o seu tesoureiro fora condenado e a Pablo Crespo mandárono para o PP estatal pola experiencia que tiña aquí. Todo o mundo sabe o que había no PP a ese respecto e queda cada vez máis claro. Moita da presenza do PP ten a ver con certos sectores que o apoiaron sempre e que están relacionados con actividades de dubidosa legalidade.