Máis de 7 millóns de euros durante 15 anos compoñen as doazóns compiladas polo ex-tesoureiro do Partido Popular, Luís Bárcenas. De 1990 a 1992 e de 1997 a 2008 --segundo informa o diario español El País.
Entre os nomes dos principais doantes que entregaron importantes cantidades de diñeiro ao tamén ex-senador e que, todo apunta, posteriormente foron repartidas entre a cúpula do Partido --incluído o actual presidente do Goberno- salientan persoas actualmente imputadas por corrupción. Porén, boa parte das persoas sinaladas por Bárcenas no seu 'albarán' negaron ao medio de comunicación que esta quinta feira lanzaba a exclusiva teren participado en operacións de financiamento de partidos políticos e mesmo aseguran que emprenderán accións legais "na defensa dos seus intereses", di El País.
Juan Roig, presidente de Mercadona que pedía @s traballador@s "traballar máis" porque se pasaran "trinta pobos" tería pagado até 240.000 euros
![Publicidade 195634]()
Neste senso, nomes como Luis del Rivero (ex presidente da construtora Sacyr) ou Juan Miguel Villar Mir (presidente da transnacional OHL) terían entregado inxentes cantidades de diñeiro ao ex-tesoureiro. As cifras varían dunhas doazóns a outras, desde "o mínimo de 48.000 euros do ano 2005) --asegura El País-- até "os máis de 1,5 millóns de 2003 e 2004".
Tamén así, a documentación publicada recolle a persoeiros actualmente imputados en casos de corrupción como Pablo Crespo --investigado polo caso Gurtel que tamén salfire as filas do Partido Popular.
O grupo Mercadona entre os principais doantes
Malia que fontes da distribuidora alimentaria negaron a súa participación nas contas de Bárcenas, os documentos do ex-tesoureiro popular apuntan cara á un ingreso de 90.000 euros en 2004 e outro de 150.000 en 2008 --segundo publica El País. As doazóns realizadas por Mercadona, xunto con outras empresas españolas de ámbito internacional, remataron en forma de sobresoldos entregados á cúpula do Partido Popular.
A información feita pública esta quinta feira polo diario español contrasta coas declaracións do presidente de Mercadona, Juan Roig en xuño de 2012, quen animaba á poboación a se pór "as pilas" se non querían que a economía española fose intervida. Aliás, Roig aseguraba que era preciso "traballar máis".
"Pasámonos como país trinta pobos", dicía o presidente da cadea de supermercados valenciá "incluídos os sindicatos, os empresarios, os bancos, os políticos, todo o país", insistía Roig.
Jiménez Losantos e Libertad Digital entre os receptores de diñeiro
Mais non só se reflicten as entradas de capital na caixa de Bárcenas. O diario El País recolle as cantidades que o ex tesoureiro popular tería entregado en concepto de "axudas" a distintos medios de comunicación e organizacións vencelladas ao PP. Neste senso salientan os máis de 36.000 euros recibidos polo xornalista Federico Jiménez Losantos en 2004 e ao portal de información dixital Libertad Digital. Organizacións como Basta Ya e mesmo a viúva dunha vítima de ETA tamén terían cobrado diñeiro procedente das doazóns inventariadas por Luís Bárcenas.
