Os membros da coligazón eleitoral laiáronse do mal estado do sector que sofre uns pagamentos por debaixo dos custes de produción, que rondan os 30 céntimos por litro. Alexandra Fernández aludiu á falla de vontade política do Partido Popular para voltear a situación: “Temos un PP que está deixando ao rural perderse, di que non se pode lexislar e non é así, Francia o está a facer e está a defender aos seus gandeiros. A diferenza está na vontade política.”
Antón Sánchez: “Galiza perdeu 1 de cada 3 empregos no sector primario, 25.000 de 71.000”
Na mesma liña, o vice voceiro de AGE, Antón Sánchez arremeteu contra o labor do actual presidente da Xunta de Galiza, no seu cargo: “Feijóo destruiu o triple de emprego no sector primario dende que chegou comparado co resto do Estado”. As cifras que argüiu Antón Sánchez son exemplificadoras da crise do sector: “Galiza perdeu 1 de cada 3 empregos no sector primario, 25.000 de 71.000”. Ademais aludiu a que o 70% das granxas fechadas no estado español son galegas, mais afirmou que a situación non é irreversíbel: “Si é posíbel facer leis que defendan aos gandeiros, é posíbel reverter a situación facendo política para os gandeiros”.
Antón Gómez-Reino: "Ten que darse unha garantía clara de que non se vai pagar por debaixo de gastos de produción.”
Pola súa Banda, Antón Gómez-Reino lamentou a “situación dramática” e chamou á reflexión colectiva sobre a importancia da gandeiría para a economía galega, mais tamén para “soster o país a nivel económico, demográfico, de lingua e de ordenación do territorio”. En canto aos plantexamentos para revertir o mal estado no que se atopa a gandeiría galega, Gómez-Reino afirmou que: “A proposta ten que ser cubrir demandas dos gandeiros en primeiro lugar, e no tocante aos prezos ten darse unha garantía clara de que non se vai pagar por debaixo de gastos de produción.”