O mapa municipal renóvase con 4 Alcaldías do BNG, 4 do PP, 1 do PSdeG e 3 de independentes

Até 12 concellos galegos —os 9 do Partido Xudicial de Noia máis os de Corcubión (comarca de Fisterra), Celanova (Terra de Celanova) e Carballeda (Valdeorras)- constituíronse esta sexta feira despois de ver aprazados os seus plenos para a conformación das novas Corporacións saídas das eleccións municipais do pasado 28 de maio debido á presentación de recursos por diferentes casuísticas. Fica aínda un municipio por se constituír, Castro Caldelas (comarca de Terra de Caldelas), esta sexta feira teñen que repetirse as eleccións municipais ao se detectar que non se mantivo a cadea de custodia de 118 votos emitidos por correo nos comicios do 28-M. Dos 102.377 veciños e veciñas que suman entre estes 12 municipios (segundo o censo do Instituto Galego de Estatística), 40.900 van ter Alcaldías do BNG, 27.800 do PP, case 19.000 do PSdeG e 21.000 terán rexedores de formacións municipalistas (Compromiso por Outes, Celanova Decide e Nós Pobra). Os plenos máis madrugadores foron os de Noia e Muros, nas comarcas do mesmo nome. No primeiro caso, foi reelecto rexedor Santiago Freire (PP) grazas ao acordo polo que a formación Noieses Independentes Agrupados (NOIA) volverá formar parte do Goberno local como fixo durante o último mandato. En Muros, a nacionalista María Lago foi elixida como nova alcaldesa grazas ao acordo subscrito polo BNG e o PSOE, que conformarán un Goberno de coalición. Ribeira pon fin a catro décadas do PP Ribeira, na comarca do Barbanza, era cos seus 27.000 habitantes a vila máis importante da Galiza que estaba aínda sen alcalde. Esta sexta feira a Corporación escolleu como rexedor Luís Pérez Barral (BNG), que puxo así fin a catro décadas de gobernos do Partido Popular. Os nacionalistas compartirán o Goberno co Partido Barbanza Independente (PBBI) e o PSdeG. Pérez afirmou, ao tomar posesión do cargo, que "comeza un tempo novo na historia de Ribeira", apelando a que "temos un futuro por gañar". BNG, Partido Barbanza Independente e PSdeG fechan un acordo que dá a Alcaldía de Ribeira ao nacionalista Luís Pérez Os outros dous municipios que esta sexta feira escolleron alcaldes do BNG foron Corcubión e Mazaricos (comarca do Xallas). No primeiro, e após un mandato liderado polo PSdeG, é agora o nacionalista Xabier Domínguez quen asume o bastón de mando. Só se presentou a súa candidatura e a do PP, pois PSdeG e Sempre Corcubión decidiron non postularse. En Mazaricos repite como alcalde Juan Branco, algo xa dado por seguro a propia noite do 28-M ao ter o BNG maioría absoluta (6 edís de 11). "Temos as portas abertas e seguiremos a traballar nos próximos catro anos para desenvolver grandes proxectos en infraestruturas, en promoción ou en xestión local", afirmou Branco. Pola súa parte, o PP sumou esta sexta oficialmente ás Alcaldías saídas do 28-M -ademais da xa mencionada de Noia- as de Lousame e Porto do Son -tamén na comarca de Noia- e a de Carballeda, na comarca de Valdeorras. Teresa Vilaverde, Luís Ouxo e Carmen González foron, respectivamente, electas rexedoras polas Corporacións, repetindo así o cargo que xa tiñan no anterior mandato. O único do PSdeG O PSdeG só obtivo un alcalde na xornada de constitución de Corporacións municipais desta xornada. Foi o de Boiro, comarca do Barbanza, concello de case 19.000 habitantes. José Ramón Romeiro García revalida o mandato, se ben agora con maioría absoluta após lograr 9 dos 17 edís. Por último, tres destes 12 municipios teñen rexedores pertencentes a candidaturas de ámbito municipal: A Pobra do Caramiñal, na comarca do Barbanza, elixiu alcalde José Carlos Vidal, de Nós-Pobra; en Outes, na comarca de Noia, repite no cargo Manuel González (Compromiso por Outes), que neste mandato gobernará co BNG e co PSdeG; e en Celanova o novo alcalde é Antonio Puga, de Celanova Decide, que tivo os votos a favor durante a sesión plenaria para a súa investidura do PSdG e do BNG. Coa constitución destes plenos e elección dos alcaldes o mapa municipal saído do 28 de maio fica completo, exceptuando o caso de Castro Caldelas. A maioría da poboación galega estará gobernada por Alcaldías do BNG e do PSdeG Alcaldías na Galiza O PP ten o bastón demando nun total de 150 concellos da Galiza. O PSdeG posúe alcaldes ou alcaldesas en 96 municipios galegos —aos que hai que sumar 3 rotativas—. O BNG ten a cabeza de Goberno en 36 concellos do país. Por último, hai 26 municipios onde as persoas que ocupan a cadeira de rexedor ou rexedora pertencen a forzas de diferente condición, desde candidaturas de circunscrición municipal a mareas locais ou listas independentes. En canto á poboación, PSdeG e BNG gobernarán ao redor de 60% das e dos habitantes da Galiza: 1,9 millóns de persoas. O PP, pola contra, por volta de 690.000 galegos e galegas (22% da poboación galega). O PP sae destas eleccións en claro retroceso nos ámbitos vilegos e pouca relevancia no urbano. A primeira localidade en habitantes gobernada polo PP é Ferrol, mantendo entre os concellos de máis de 25.000 residentes só o Executivo de Arteixo após perder unha praza tan emblemática como Ribeira, que pasa ter alcalde nacionalista. O PSdeG perdeu 72.000 votos no 28-M e malia perder cidades como Compostela ou Ferrol, mantén Vigo e Lugo e vilas de peso como Vilagarcía, Viveiro ou Redondela. O BNG, pola súa parte, aumentou o 28 de maio en 30% o número de edís, goberna en dúas das sete cidades e logrou tres Alcaldías nas vilas de máis de 25.000 habitantes. Vía libre para a constitución das Deputacións da Coruña e Ourense O rexistro dos recursos que adiou a constitución de 12 Corporacións municipais motivou tamén que os plenos para designar as novas corporacións das Deputacións da Coruña e Ourense se atrasaran até mediados do presente mes de xullo. No caso da Coruña prevese que o secretario xeral do PSdeG e actual presidente en funcións da entidade, Valentín González Formoso, continúe como mandatario da Deputación e que se reedite o acordo entre o PSdeG e o BNG. Após os comicios do 28 de maio, a Deputación fica conformada por 14 representantes do PP, 10 do PSdeG (1 menos que en 2019), seis do BNG (2 máis que hai catro anos) e 1 de Alternativa dos Veciños. Marea Atlántica perdeu a súa representación na institución provincial. Tamén terá que esperar até mediados de xullo a constitución da futura corporación da Deputación de Ourense. Alí, todo apunta a Luís Menor como novo presidente, substituíndo Manuel Baltar. O 17 de xuño, os populares e o rexedor da cidade das Burgas e líder de Democracia Ourensá (DO), Gonzalo Pérez Xácome, selaron un acordo que implica deixar gobernar a lista máis votada tanto no Concello —onde DO ficou como primeira forza—, como na Deputación —onde os populares quedaron a un deputado de obter a maioría absoluta—. A Deputación de Ourense está composta por 25 escanos, o que sitúa a maioría absoluta en 13. Após as municipais, o Partido Popular obtivo 12 escanos, o PSdeG logrou 7, o BNG conseguiu 3 representantes e Democracia Ourensá outros 3 asentos.