Feixoo abre as portas do PPdeG ás dirixentes de Ciudadanos na Galiza

Núñez Feixoo sabe que o 5 de abril cada voto conta e vai ser importante para chegar a esa liña, que segundo enquisas e sondaxes parece moi fina, que afasta a vitoria da derrota. Por iso, se ben non quer saber nada dunha coalición con Ciudadanos, tal e como lle insiste Arrimadas, quer evitar que esa posición semelle un ‘desplante’ a votantes da formación laranxa noutros comicios. De aí que faga chiscadelas, non só á base electoral de Cs na Galiza senón tamén ás súas dirixentes e cargos.

Así, o presidente reafirmouse unha xornada máis no seu rexeitamento a ir ás eleccións do 5 de abril nunha coalición con Ciudadanos (Cs). Esta quinta feira argumentou que ás e aos galegos "non lles gustan as improvisacións" senón que prefiren os "proxectos consolidados", antes de insistir: "os dirixentes de Cs aos que lles gusta a estabilidade e a moderación caben no PPdeG".

A preguntas dos medios, Feixoo asegurou que se sente "rotundamente apoiado" pola dirección do PP en relación a que Galiza se manteña á marxe da hipotética coalición con Cs que Inés Arrimadas puxo sobre a mesa para concorrer ás próximas citas electorais galega, vasca e catalá

Tras o Consello da Xunta, o dirixente popular non ocultou o seu malestar ante a insistencia das xornalistas en relación ao hipotético acordo con Cs, xa que entende que hai unha "estratexia" por parte da formación laranxa para "usar o PPdeG" para lograr "notoriedade".

"Se lle parece, por que non falamos de Galiza? Non vou ocupar os primeiros días (de precampaña, deu a entender) falando dun partido político que non é o meu. Eu veño aquí a falar de Galiza. Se hai outros partidos que teñen interese en usar o PPdeG para que se fale deles, paréceme unha estratexia brillante e intelixente, pero aquí falamos de Galiza", remarcou.

Portas abertas

Dito isto, reafirmou que o PPdeG mantén "as portas abertas" a Ciudadanos e precisou que non é que o diga "el", senón que "o din os feitos". Así, remitiuse aos "máis de 100.000 votantes" que no ano 2016 votaron nas eleccións estatais "a favor de Cs" e despois, nas galegas, apoiaron o PP galego.

"Espero que igual que os votantes de Cs confían no PPdeG, os dirixentes vaian detrás dos seus votantes. Iso sería o lóxico", esgrimiu, convencido de que "hai dirixentes" da formación laranxa que opinan "o mesmo" que el.

Engadiu que na Galiza o proxecto "consolidado" é o PPdeG, no que -insistiu-- "caben" os dirixentes de Cs. "Aínda que non teñan representación parlamentaria, nin ningunha alcaldía ", dixo.

"A pesar diso, os dirixentes de Cs aos que lles guste a estabilidade e a moderación caben no PPdeG", reafirmouse.