Rodríguez Pardo (1936-2018), avogado de profisión, fixo parte da equipa de dirixentes políticos que en agosto de 1963, na clandestinidade, fundaron o Partido Socialista Galego, a formación socialista á que se unirían mozos que logo serían protagonistas relevantes da vida política e tamén cultural do país, entre eles Xosé Manuel Beiras.
Pardo foi dos políticos do PSG .-canda Ceferino Díaz e o que acabaría sendo presidente da Xunta, Fernando González Laxe- que tomaron a decisión de se integrar no PSOE, partido ao que se sumarían como colectivo en 1978.
Xa no PSOE foi secretario xeral do PSdeG e deputado no Congreso. Aliás, tomou parte na asemblea de parlamentares que elaborou o Estatuto de Autonomía de Galiza. Tamén foi senador e durante unha lexislatura (1989-1993) deputado no Pazo do Hórreo.
Foi tamén un incansábel activista pola cultura -cofundador da Agrupación Cultural O Facho na Coruña- e polo debate público, sempre nunha liña de defensa do ideario socialdemócrata e galeguista.
A morte de Rodríguez Pardo tivo impacto en twitter, con mensaxes de homenaxe e condolencia por parte dos seus compañeiros e compañeiras, entre eles o actual secretario xeral do PSdeG, Gonzalo Caballero.
Os e as socialistas galeg@s sentimos hoxe a perda de José Luis Rguez Pardo, socialista e galeguista, quen foi secretario xeral do @PSdeG. A semana pasada dabame apoio para o partido. Hoxe o despedimos recoñecendo o seu compromiso vital. DEP.
— Gonzalo Caballero (@G_Caballero_M) 12 de xuño de 2018
