As empresas da contabilidade paralela do PP galego: unhas doazóns por aclarar

O 15 de xullo de 2013, Luis Bárcenas testemuñou durante horas diante do xuíz Pablo Ruz sobre as contas do PP. Segundo sinalou o diario El País, o tesoureiro da organización ofreceu diversa información sobre o financiamento irregular dos populares galegos e sobre o emprego de diñeiro negro en diversos procesos electorais, achegando documentos que apuntaban á existencia dunha dobre contabilidade. Á vista do material entregado por Bárcenas, Ruz chegou a estimar que o PP podería ter empregado 1.679.825 euros de diñeiro negro na campaña das galegas de 2005, ano en que a formación, liderada entón por Manuel Fraga, perdeu a maioría absoluta.Un dos informes que chamou a atención de Ruz foi elaborado en 2006 polo xerente do PP galego naquela época, Modesto Fernández, e nel recolleuse que 19 grupos empresariais achegaran ao partido 1.888.275 euros. Algunhas destas compañías, cuxas doazóns superaban en determinados casos o límite fixado pola lexislación, partillaban relacións mercantís de diverso tipo coa administración galega. Ao tempo, moitas delas facturaban para departamentos da Xunta da Galiza dirixidos por Alberto Núñez Feixoo, for na súa etapa como secretario xeral da Consellaría de Agricultura, for como conselleiro de Ordenación do Territorio, e a partir de 2009 como presidente. O ex xerente do PP sinalou que 19 empresas deran ao partido 1.888.275 euros As empresas ligadas á construción e á obra civil lideraron a lista de contribuíntes. Á cabeza da mesma situouse en 2006 a ourensá Copasa, con 380.245 euros, unha compañía cuxo nome tamén apareceu entre as sinaladas polo pago de comisións nas obras do AVE á Meca. Malia que os responsábeis da compañía negaron ao citado diario as doazóns recollidas nos papeis de Bárcenas, as dúbidas sobre a súa operativa seguen sen resolverse. A isto ten contribuído que a empresa aparece como unha das grandes beneficiadas nos contratos da Xunta, destacando as adxudicacións do Goberno de Fraga ou as concesións de Núñez Feixoo, entre elas a construción e explotación por 30 anos da autoestrada de Ourense a Celanova. FCC e CRC Ramón Carro foron outras dúas compañías adxudicatarias de obras de construción e mantemento de autoestradas que apareceron no informe de Modesto Fernández. A primeira, actualmente propiedade do magnate mexicano Carlos Slim e presidida naquela altura por José Mayor Oreja, irmán do ministro de Interior de Aznar e candidato PP vasco, Jaime Mayor Oreja, achegou á caixa dos populares galegos 108.000 euros, recibindo anos máis tarde, con Feixoo de presidente, a contrata da autovía a Berdoias (Vimianzo) por 979 millóns de euros. A segunda, unha compañía con sede en Ordes, achegou ao PP 33.000 euros, adxudicándolle dentro dunha Unión Temporal de Empresas (UTE) en 2011 a construción e xestión da autovía da Costa da Morte. As empresas da obra civil A nómina de empresas da obra civil é moi ampla, mantendo a maioría delas relacións contractuais na época de Manuel Fraga coa Consellaría de Ordenación do Territorio, dirixida entón por Alberto Núñez Feixoo. A carón da madrileña ACS, cunha contribución de 60.100 euros, situáronse Teconsa, propiedade do grupo berciano Martínez Núñez, con 120.000 euros, a ourensá Extraco con 18.000 euros, Seixo con 30.000 euros ou a vasca Bruesa con 80.000 euros. Esta última compañía é propiedade do empresario galego emigrado en Euskadi Antonio Pinal, sinalado en diversas tramas de corrupción ligadas ao PSOE e ao PP e a quen xustiza acusa de ter agasallado ao PP a súa sede de Donostia. O conglomerado de empresas que participaron nas obras dos diversos edificios da Cidade da Cultura ocuparon un lugar de relevo no informe do xerente do PP. Ademais da xa citada Copasa, entre estas atopáronse Necso, unha filial da madrileña Acciona, que achegou aos populares 100.000 euros e que fixo parte da UTE para a construción do Teatro da Música, unha obra por un monto de 77 millóns de euros, adxudicada en xuño de 2005 polo Goberno da Xunta en funcións, onde sentaba Núñez Feixoo. Por último, o grupo Campo, empresa familiar participada polo alcalde do PP de Ortigueira, Antonio Campo, beneficiada tamén con importantes contratos na Cidade da Cultura achegou, segundo Fernández, 200.000 euros á caixa dos populares galegos. O próximo día 24 bng e psoe preguntarán a feixoo polas contas do PP O trato de favor do Partido Popular ao negocio do xogo é obxecto de crítica constante por parte das forzas da oposición na Galiza. BNG e PSOE criticaron no pasado mes de xaneiro, en sede parlamentar, que a Lei de acompañamento dos orzamentos estabelecera unha rebaixa fiscal sen precedentes para as empresas do sector, que no caso de casinos e bingos acadou o 20% dos impostos de 2020 e no de máquinas ou aparellos automáticos o 30%. Na mesma liña son coñecidas as vinculacións entre dirixentes do PP e da patronal do xogo, organizada na denominada Asociación Galega de Empresas Operadoras (AGEO). O presidente desta última, Serafín Portas, está casado en réxime de gananciais coa deputada popular por Pontevedra Lupe Murillo. As compañías do xogo Luckia, actual marca comercial do grupo Egasa, é unha das principais empresas do sector. A compañía, presidida por José González, viuse favorecida en 2015 por unha modificación da Lei do xogo da Galiza, aprobada en solitario polo PP través da Lei de acompañamento dos orzamentos, que lle permitiu abrir unha sala de xogo en Vigo, como extensión do casino da Toxa (O Grove), explotado por esta empresa e polo grupo catalán Cirsa. Egasa é unha das compañías que tamén aparece no informe de Modesto Fernández como doante do PP da Galiza, ficando rexistrada na contabilidade paralela unha achega desta compañía por unha contía de 100.000 euros. A relación de compañías referidas no documento da xerencia do PP da Galiza e entregado por Bárcenas a Ruz cita un grupo de sociedades e empresarios de relevo no mundo económico do país. Así, sinálase a Amador Castro, que naquela altura monopolizaba o negocio da inspección de vehículos; a empresa de servizos hidráulicos Espina y Delfín, cunha contribución de 47.700, e á compañía padronesa do aluminio, Cortizo, cunha doazón de 222.000 euros. A maiores da actividade metalúrxica, a empresa mantén intereses noutros sectores como as enerxías renovábeis, cuxa dependencia das concesións da administración galega é coñecida. Unha explicación sobre as contas do PP na Galiza O informe elaborado en 2006 polo ex xerente do PP galego Modesto Fernández é unha instantánea dun momento concreto do financiamento desa formación no país. As anotacións non só fan referencia a unha época onde boa parte dos dirixentes actuais da formación ocupaban cargos de responsabilidade, senón que retrata unha mecánica en que os principais doantes dos populares eran empresas que mantiñan relacións mercantís coa Xunta da Galiza. A este respecto, signifícanse as achegas de compañías do sector da construción, beneficiadas por importantes contratos públicos nos últimos anos de Manuel Fraga, con Alberto Núñez Feixoo exercendo de máximo responsábel da Consellaría de Ordenación Territorial e vicepresidente do Goberno galego. O actual presidente da Xunta e os responsábeis do seu partido sempre se negaron a dar a unha explicación sobre estes feitos. Resultan clarificadoras as palabras do portavoz do PP galego, Pedro Puy, fechando a porta a explicar os testemuños do antigo xerente estatal Cristobal Páez e do tesoureiro Luis Barcenas, quen declararon na Audiencia Nacional que en 2010 o PP de Pontevedra achegou 50.000 euros de orixe presuntamente ilícita á caixa B da formación. A vindeira cuarta feira, BNG e PSOE preguntarán a Núñez Feixoo no Parlamento da Galiza sobre as relacións do PP de Pontevedra, naquela altura presidida por Rafael Louzán, coa trama de financiamento irregular da formación. Ese mesmo día Mariano Raxoi testemuñará, tamén en relación con eses feitos, na Audiencia Nacional, pola que tamén pasará nas semanas seguintes Pablo Crespo, antigo secretario de Organización dos populares galegos, quen semella disposto a responder moitas das preguntas que Feixoo e Raxoi non contestan.