A elección do presidente da Deputación de Ourense abre unha fenda no PP

O acordo asinado entre o Partido Popular (PP) e Democracia Ourensá (DO) non garante a estabilidade no Concello nin na Deputación de Ourense. Malia que o pacto entre ambas as formacións fixa o Goberno da candidatura máis votada nas dúas institucións, son aínda moitas as ponderábeis por fechar que adiantan uns mandatos axitados. As friccións internas entre os populares, o horizonte xudicial do rexedor Gonzalo Pérez Xácome e os vindeiros procesos electorais debullan un escenario endiañado. O principal obxectivo do Partido Popular da Galiza após os comicios do 28 de maio foi reter o Goberno da Deputación de Ourense. A esta finalidade, condicionou toda a súa política de alianzas postelectorais, na perspectiva de que unha mudanza no Executivo desa institución puña en risco a súa hexemonía na circunscrición. Tanto é así, que na propia noite lectoral comezaron os seus contactos con Pérez Xácome, fechados finalmente na noite da sexta feira do 16 de xuño, coa participación do vicesecretario xeral de Organización do PP estatal, Miguel Tellado e do vicepresidente primeiro da Xunta da Galiza, Diego Calvo. A batalla pola Deputación O pacto con Pérez Xácome abre unha nova guerra nas filas dos populares. Neste caso, a batalla máis dura líbrase pola Presidencia da Deputación, onde a dirección galega e a maioría da militancia ourensá pelexan por colocar unha persoa da súa confianza. A este respecto, os alcaldes do PP de Ourense consultados por Nós Diario aseguran ter o compromiso de Alfonso Rueda de que o novo responsábel da institución será escollido na provincia e descartan o nome de Luís Menor, rexedor do Pereiro de Aguiar e persoa próxima ao aparato galego. Así, entenden que calquera proposta non avalada pola afiliación ourensá condena o partido a unha fenda. A alcaldesa de Oímbra, Ana Villarino, semella unha das mellor situadas para suceder Manuel Baltar. Villarino, secretaria xeral do PP de Ourense desde decembro de 2021, membro da Xunta de Goberno da Deputación e integrante do círculo de máxima confianza de Manuel Baltar, exerce de rexedora desde 2015, cando herdou a Alcaldía do seu proxenitor, Alfonso Villarino Rodríguez, mandatario do municipio desde 1979. Sexa ou non Villarino a finalmente escollida, os dirixentes populares da circunscrición apostan por un perfil nesa dirección e lembran que a práctica totalidade dos alcaldes ourensáns débenlle o cargo á familia Baltar. O candidato do PP galego A dirección galega do PP garda silencio sobre o sucesor de Baltar e nega calquera acordo co barón ourensán sobre a Presidencia da Deputación. A este respecto, as fontes consultadas por Nós Diario indican que o partido en Ourense atópase nunha nova etapa e que os resultados das eleccións locais avanzan cambios nas formas de goberno e no funcionamento do partido. Asemade, revelan a existencia dun fondo malestar con Baltar de diversos rexedores ourensáns que non se sentiron debidamente atendidos neste mandato. O factor Cabezas O PP mantén unha segunda fronte aberta e sitúase no Concello de Ourense. Neste caso, a dirección dos populares galegos non dá importancia á discrepancia co acordo con Pérez Xácome expresada polo seu alcáldabel Manuel Cabezas ou polo concelleiro José Araúxo. Porén, non descartan que a renuncia á acta de edil adiantada por Cabezas o pasado sábado abra a porta a un conflito entre os próximos a Baltar e os fieis ao aparato galego, que sumarían, neste momento, unha clara maioría na cidade. A situación de Xácome O principal factor de inestabilidade para o Executivo de Xácome podería chegar da esfera xudicial. Precisamente, a Fiscalía deberá resolver a causa aberta contra o rexedor por posíbeis delitos de prevaricación, malversación, suborno e tráfico de influencias, correspondéndolle a outras xuízas e xuíces da cidade atender as querelas presentadas polo PP, PSdeG e BNG. Neste sentido, fontes coñecedoras da negociación entre Democracia Ourensá e o Partido Popular apuntan que está cuestión estivo na axenda dos temas tratados entre as dúas forzas. Precisamente, a gobernabilidade de Ourense centrou a comparecencia de onte do voceiro popular na Cámara galega, Pedro Pui. Neste sentido, defendeu a continuidade de Xácome na Alcaldía sinalando que “os resultados foron os que foron. Hai un candidato que ocupa a Alcaldía, que ten a lista máis votada e mellorou os resultados”. Pui avalou a posición dos populares afirmando o PP "fixo o que tiña que facer, votarse a si mesmo". A portavoz nacional do BNG, Ana Pontón, explicou onte que o acordo entre o PP e Democracia Ourensá era “moi previsíbel” porque “os populares sempre antepoñen o interese partidista ao da cidadanía”. Nesta liña, indicou que “en Ourense pasou exactamente o que dixen que ía pasar, díxeno de forma pública, que era o escenario máis posíbel”, e lembrou que xa afirmara que o PP pactaría de novo con Xácome "se era necesario para manter a poltrona caciquil da Deputación”. O voceiro parlamentario do PSdeG, Luís Álvarez, asegurou que “fixemos todo o posíbel por propiciar un cambio político na Deputación de Ourense” e acusou o PP de “blindar” Xácome “a cambio de manter a toda costa o baltarismo sen Baltar na Deputación”. A falta de acordos condena unha ducia de concellos á inestabilidade A inestabilidade política paira sobre unha ducia de concellos galegos onde as forzas políticas alternativas ao PP non chegaron a un acordo para a sesión de constitución das corporacións do pasado sábado. Neste sentido, a voceira nacional do BNG, Ana Pontón, afirmou onte que "houbo algúns concellos onde houbo situacións que non permitiron avanzar" e apostou por “traballar para reverter a situación e que, podendo haber gobernos alternativos ao PP, aínda podemos facelo realidade”. Mugardos é un dos municipios nesta situación. Neste concello da comarca de Ferrol, Esquerda Unida, liderada pola ex alcaldesa da localidade Pilar Díaz, entregou co seu voto a Alcaldía ao popular Juan Domingo de Deus, que conta con cinco edís fronte a oito das formacións de esquerda. Outro deles é Cariño (comarca de Ortegal), onde a falta de acordo entre nacionalistas e socialistas, empatados a tres actas, outorgou o Goberno á dereita.Viana do Bolo é un caso análogo. O municipio da comarca de Viana continuará nas mans dos populares, que chegaron á Alcaldía en 2021 após unha moción de censura ao BNG con concelleiros tránsfugas saídos das filas socialistas. Precisamente, a decisión do PSdeG de non apoiar na investidura deste sábado ao candidato do BNG, Secundino Fernández, propiciou que se manteña o PP. Pola súa parte, en Ramirás (comarca de Celanova), os votos do PP e do PSdeG apartaron do Goberno o candidato máis votado o 28 de maio, Marcos Méndez (BNG).