Os ex concelleiros de Democracia Ourensá, que agora forman parte de coalición de Centro Democrático de Ourense para concorrer ás municipais, denunciaron ante os medios que Pérez Xácome, alcalde de Ourense, chegou a ofrecerlles "30.000 euros" se deixaban a acta no Concello.
"Falamos de cantidades, 30.000 euros a María Dibuja e Maite Garrido se deixaban a acta ou 2.000 euros ao mes a Garrido se mantiña a acta pero votaba seguindo as instrucións", trasladou o coordinador de CDC José Manuel Palacios.
Deste modo, Palacios apuntou que Xácome "baixou á area porque é a única solución que ten, está ansioso, pasan os meses e só pode poñer catro xardineiras en Xoán XXIII".
Foi máis aló, esgrimindo que non poden "levar unha gravadora sempre acesa", pero "30.000 euros é unha cantidade que coincide con doazóns doutros e ademais 30.000 euros coincide co que custa o proxecto da Xunta para o tema da residencia e que non quixeron facer".
Ademais, Palacios contou que Xácome dixo a Maite Garrido que Caride, o edil que abandonou a política, "aceptara esa cantidade".
"Nós non o sabemos, pero iso é o que lle dixo el directamente a ela, eu non se se el colleu o diñeiro, o que si me creo é que Xácome llo dixo", agregou.
Nesta liña insistiron en que "hai políticos que non se venden nin por 30.000 euros nin por prevendas" e que cos seus tres votos "non poderá desmantelar o concello".
Así mesmo, Palacios trasladou que a querela interposta por Fiscalía en base a unha denuncia anónima por irregularidades nas contas de DO, "contén datos dun informe que só tiñamos Caride e eu" e que "lle presentamos ao PP de Santiago", Concluíndo con "se nós non a puxemos, quen o fixo?".
