O BNG marca folla de ruta de cara ás municipais: nomeará as persoas candidatas nas sete cidades antes do 25 de xullo

O Consello Nacional do BNG, o seu máximo órgano entre asembleas, aprobou a folla de ruta coa que aspira a lograr nas eleccións municipais de 2027 aumentar en Alcaldías e en representación en todos os concellos. Estará marcada por unha "intensa" axenda de mobilización con varias citas e tamén por un obxectivo a curto prazo, ter designados en catro meses, antes do 25 de xullo, as persoas candidatos das sete grandes cidades.

Anunciouno a portavoz nacional do Bloque, Ana Pontón, nun discurso que arrincou cunha análise da situación política internacional e a proclama de "non á guerra", e que concluíu cun "adiante ou BNG!" en recordo do ex alcalde de Allariz Francisco García, un referente no nacionalismo galego municipalista, falecido a finais do pasado mes de xaneiro.

Tras subliñar que o mundo vive "momentos complexos e difíciles", Pontón apelou ao papel do BNG como "alternativa" ás portas da apertura dun ciclo electoral "intenso" que ten nas municipais de maio de 2027 a súa primeira cita. "O noso obxectivo é moi claro: conseguir máis concellos gobernados polo BNG e aumentar a nosa representación con máis edís ao longo de todo o país", proclamou.

Con este obxectivo, remarcou que é "importante" traballar "con planificación" e contacto "directo" coa veciñanza, antes de explicar que o Consello Nacional aprobará unha folla de ruta encamiñada a "activar" a organización e "chegar con todo a punto" á próxima cita coas urnas.

Así, marcou o horizonte para a designación dos cabezas de cartel nas urbes (antes do Día da Patria Galega), mais tamén anunciou unha "intensa" axenda de mobilización municipal que inclúe tres citas: un encontro específico das cidades, outro de Gobernos e cogobernos municipais, e un terceiro grande encontro nacional "multitudinario" que sirva como "pistoletazo de saída" cara aos comicios.

O modelo municipalista do BNG, o "mellor aval"

Máis alá de aumentar a representación nos consistorios galegos, Pontón reivindicou a necesidade de "consolidar e afianzar" o proxecto do BNG. A formación ten, dixo, "o mellor aval posíbel" nos propios "feitos" dos seus Gobernos municipais, que demostran que "hai outra forma de facer política" e que poñen "as persoas no centro".

"Ese modelo é o mellor aval para pedir a confianza de veciños e veciñas, e seguir ampliando a base social", esgrimiu, antes de incidir en que os e as dirixentes do BNG nos Gobernos locais demostran no día a día que non están para "quentar a cadeira" nin para actuar desde "a rutina".

"Outra oportunidade para seguir consolidando o avance"

"Os nosos Gobernos avanzan en igualdade, xustiza social, e apostan por crear espazos públicos de calidade, ademais de apostar pola nosa lingua e cultura. Prosperan porque poñen no centro ás persoas fronte a un PP que recorta e privatiza á conta da saúde, da igualdade e mesmo dunha vellez digna", resolveu.

Finalmente, a dirixente nacionalista apelou ao "contacto directo" cos veciños e coas veciñas, convencida de que as municipais son "outra oportunidade para seguir consolidando o avance do BNG". "Depende de cada un e cada unha de nós, da nosa capacidade de falar claro aos veciños, de explicar o noso proxecto e de tender pontes coas persoas que hoxe nos miran con esperanza, mais que aínda non deron o paso de coller a papeleta do BNG", concluíu.