A portavoz do BNG no Congreso, Olaia Fernández Davila, pon o foco nas marcas brancas, “consideramos necesario revisar a lexislación sobre a existencia das marcas brancas de cadeas de distribución”. Trátase, segundo a nacionalista, dun “elemento de extorsión e de engano”.
“É consciente de que a lexislación vixente permítelles ás cadeas de distribución colocar nos lineais os seus produtos en forma branca?”, pregúntalle a deputada nacionalista á ministra de Agricultura en relación á “laxitude” da normativa actual.
Comparecencia da ministra de Agricultura
Ademais, a nacionalista solicitou a comparecencia da ministra de Agricultura para que explique no Congreso o denominado Plan de Apoio ao Sector Lácteo, subscrito entre a industria, as cadeas de distribución, o Goberno e “só unha parte das organizacións agrarias”. Lembra Fernández Davila que “as principais organización agrarias que aglutinan a maior parte do sector negáronse a asinar un acordo que non inclúe as demandas máis importantes dos produtores, como a clarificación do que é o prezo sostíbel”.
Pola outra banda, a deputada do BNG propón a creación dunha Comisión de Seguimento gobernamental, da que formen parte as autonomías, para vixiar o cumprimento do acordo e para evitar que se repita o sucedido nos últimos anos.
