A portavoz nacional do BNG, Ana Pontón, avanzou que mañá 3 de novembro os nacionalistas buscarán que a Cámara convoque un pleno monográfico, que inclúa a comparecencia do presidente da Xunta, co obxectivo de abordar toda as cuestións relacionadas coa crise do coronavirus.
"Os parlamentos teñen que estar activos ante a maior crise sanitaria", salientou Pontón en rolda de prensa, na que explicou que esta solicitude, presentada por escrito o pasado 22 de outubro -segundo consta no rexistro parlamentar-, será elevada á xunta de portavoces de mañá.
A dirixente nacionalista denunciou que o mandatario autonómico apenas falou en sede parlamentaria "30 minutos", que usou "maioritariamente para atacar a oposición" e advertiu de que "nada substitúe os parlamentos". "Necesítase que o poder lexislativo estea máis forte que nunca. É unha cuestión básica", aseverou.
A xuízo do Bloque, o presidente da Xunta ten que "comparecer" para "dar explicacións" e abordar "medidas e solucións" para facer fronte á situación sanitaria en todos os ámbitos, a saúde e a economía. "O primeiro é salvar vidas", dixo, á vez que defendeu que canto antes se adopten as medidas, tamén se poderán salvar máis empregos.
"Demoledora”
Na súa intervención en rolda de prensa, Pontón foi contundente ao afirmar que esta segunda onda "está a ser demoledora" e incidiu na "falta de anticipación, estratexia clara e eficaz" para loitar contra o virus.
Ademais, acusou o Goberno galego de estar "instalado na opacidade, na falta de transparencia e información clara á cidadanía".
Neste sentido, preguntou polo "número de rastrexadores" que hai na Galiza, unha cifra que a Xunta non aclarou e que o propio conselleiro de Sanidade, Julio García Comesaña, rexeitou desvelar para evitar comparacións con outras autonomías, como xustificou nunha entrevista en 'La Voz de Galicia' este domingo.
A dirixente nacionalista sinalou que a Atención Primaria "está colapsada" e que "non se pode ir nin ao médico de cabeceira". "E o que se ofrece é unha chamada de teléfono". "Substituíuse unha lista de espera por unha chamada en espera", censurou Pontón, quen considerou que "se isto non é serio nunca, moito menos nunha pandemia".
Por iso, considerou necesario saber "se a Xunta e o Goberno galego teñen un plan para garantir a atención sanitaria", respecto diso do que sinalou que hai expertos sanitarios que advirten de que "hai moitas doenzas crónicas que se están vendo afectadas" e que "non poden seguir esperando".
Preguntada por se considera que hai que tomar outras medidas máis restritivas na Galiza, Pontón sinalou que para "ir máis aló de cales son as medidas, necesitan ter todos os datos" sobre a situación epidemiolóxica.
