As imaxes do presidente da Xunta en compaña do narco arousán non deixan de suscitar opinións. A última a do Valedor do Pobo, José Julio Fernández quen malia a considerar que non existía "interese xornalístico" a día de hoxe para a súa publicación, asegura que non é precisa unha maior regulación dos medios de comunicación para evitar este tipo de informacións.
"Xa existe" acrecentou con rotundidade, un marco normativo que rexe a actividade xornalísta enmarcado na Constitución española de 1978. Desta maneira, Julio Fernández sae en defensa do presidente da Xunta e considera as imaxes pouco interesantes para a opinión pública. Fernández matizou que as fotografías datan da década dos '90 e argüe que o tempo trancorrido devaluou o interese xeral que rexe a publicación deste tipo de informacións.
No entanto ao longo desta semana verquéronse ríos de tinta arredor deste escándalo e como puido recoller Sermos Galiza, a cidadanía cre que a amizade de Feijóo e Dorado non era casual e que o líder do executivo galego debe dar explicacións pola súa relación co narcotraficante.
O Valedor cre que as imaxes carecen "de interese xornalístico"
Limitar a publicación de informacións comprometidas
Porén, malia a considerar de pouco interese mediático a publicación das imaxes, Julio Fernández subliñou que non sería preciso mudar a lexislación para fixar límites máis estritos a este tipo de informacións. A súa resposta viña a colación das declaracións feitas polo presidente da Comunidade de Madrid quen tildou de inaceptábel e inadmisíbel as fotografías publicadas polo diario español El País. Ignacio González considerou que as imaxes supuñan "un dano enorme" para a opinión pública e lanzou un chamamento a endurecer as leis e estabelecer límites aos medios para evitar que casos semellantes se volvesen (re)producir.
As consideracións do presidente madrileño si foron recollidas polo vice-presidente galego. Alfonso Rueda asegurou en declaracións aos medios de comunicación que o debate arredor dunha maior restrición na publicación deste tipo de informacións "está cima da mesa". "Os dereitos dun rematan onde comezan os do outro", indicou a man dereita de Alberto Núñez Feijóo quen apelou ao "dereito á propia imaxe" para denunciar a publicación das fotografías.
Alfonso Rueda di que o debate sobre un endurecemento normativo está "cima da mesa"
O vice-presidente criticou asemade aos grupos da oposición, concretamente ao PsdeG por estaren a empregar as polémicas imaxes para "desgastar ao presidente da Xunta". Neste senso, Rueda asegurou que o executivo galego achegará a información demandada pol@s socialistas --que exixen aclarar se existiu algunha relación entre as contratacións do executivo galego e as empresas do narco arousán-- sempre que esta se solicitase "polos cauces reglamentarios".
Aliás, o presidente terá que responder ás cuestións achegadas polas forzas da oposición a vindeira terza feira na comparecencia parlamentar que terá lugar na Cámara galega.
