Unha viaxe ao interior das nosas mentes

A banda chegou ao cume con Tônus (2018), o seu terceiro álbum. Cun ton escuro, nunha introspección física e agarimosa, falábase de choros, de sangue, de suar, de encontros románticos ou sexuais e de berrar. Interior / Carne Doce / Autoeditado / 2020 / Doce pezas / 10 euros Procuraba achegar nun rock moderno cuestións do día a día dunha maneira explícita, na procura de que o son fose quen de facernos sentir cómodos e comprendidos, pero sempre mostrando, aínda de maneira residual, certa rabia que busca asentarnos na terra. Para este 2020, con Interior, os de Salma Jô buscan todo o contrario. Desde os primeiros segundos de "Temporal", canción coa que abre o álbum, notaremos unha mestura máis lixeira e repetitiva que buscará levarnos a un transo metafísico, onde vale máis sentir que palpar. A conexión que nos rodea non importa, senón coñecernos por dentro. Carne Doce farán fincapé nos nosos sentidos máis que nas nosas interaccións sociais. Procurarán que pensemos no que cheiramos, vemos ou saboreamos, así como tamén no efémero que isto acostuma ser. Os encontros entre individuos nunca chegan a completarse, pero insístese nas sensacións que estas poderían producir se ocorresen. O ton colle forma en temas como "Hater", no que a interacción social é tratada de maneira despreocupada, coma se ningún tipo de elemento negativo puidese romper a atmosfera do disco. No tema, Salma Jô refírese aos seus haters como covardes predilectos, pero en ningún momento interactúa directamente con eles, mesmo cando se atopan pola rúa. En todo momento, o conxunto semella unha lembranza de algo pasado e cavilado a posteriori, en momentos de introspección comúns que todos temos, tal que pensar no teu día antes de durmir, mentres fregas a louza ou na ducha. Todo ten un aire persoal e honesto. A música axuda a crear esta sensación de illamento reflexivo. Ao igual que comentamos de "Temporal", todos os temas manteñen a mesma liña de tranquilidade e mestura simple. Similares pero diferenciábeis entre elas, as pezas seguen a fórmula de repetir unha guitarra ou percusión, para achegarse a un son psicodélico que busca que fechemos os ollos e decidamos evadirnos entre os sons. Carne Doce amosa forza nas súas letras e acompáñaas dunha enerxía instrumental que fai que os seus proxectos, sobre todo a medida que se avanza na súa discografía, resulten completos. Interior é un paso máis na creación destas sensacións, feito para sentirnos a nós mesmos.