Salvador Sobral (bmp): Marcando a extensión do territorio

Dicir que bmp é un disco jazzístico non é faltar a verdade, mais tampouco dá conta da amplitude dos rexistros nos que se apoia. Salvador Sobral móvese no terreo do pop, mais reviste as súas melodías dun envoltorio musical complexo, plural e cheo de capas que o emparentan con múltiplos xéneros. En realidade, o que importa é que este vén sendo o disco máis completo da súa carreira, e iso coincide con ser tamén o primeiro composto e escrito na súa totalidade polo propio Sobral (sempre coa complicidade do seu parceiro Leo Aldrey). Algo haberá aí de crecemento persoal.