Por que?

Con esta pregunta -por que?-. presentouse o adestrador portugués José Mourinho nunha rolda de prensa alá por 2011. Esa simple pregunta conseguiu durante semanas, ser primeira plana en todos os medios de comunicación posibles, tanto deportivos, como de crónicas sociais ou culturais. Desde a Asociación de Gaiteir@s Galeg@s (AGG) non sabemos se imos conseguir o mesmo resultado, pero facémonos a mesma pregunta, cambiada de contexto. Por que na Radio Galega, incluíndo todas as súas emisoras, soa tan pouca música en galego? Tres son as emisoras polas que emite a nosa canle pública, e dúas delas dedicadas especialmente á música, Son Galicia Radio e Radio Galega Música, a primeira delas cunha programación composta de 24 horas de música continua. Con estas ferramentas e coñecendo que somos un pobo de artistas, poderíamos ter unha plataforma que nos fixese ser únicas en todo o Estado, unha programación onde soasen as nosas artistas, tanto de folk como do resto de xéneros musicais feitos no noso país e en galego. Isto é algo que levamos vivindo durante varias tempadas, son feitos que podedes comprobar sintonizando calquera das emisoras, e prestade atención a todo o tempo que pasará até que soe algo no noso idioma. Se levamos todo isto ao folk, o espazo radiofónico na canle pública queda relegado a un único programa, O Lume na Palleira, conducido polo noso compañeiro Emilio Españadero e que leva emitíndose desde 1996. Nós, a AGG e da man de Emilio, temos un espazo dedicado á nosa música e baile tradicional en dito programa, o coñecido Recuncho da Palleta, no que tentamos dar cabida a asociacións, informantes ou xente particular que fan dalgún xeito que a nosa tradición perdure ao longo dos anos. Neste 2023 emitiuse un único programa do Lume na Palleira, o seu presentador tivo que tomar un descanso e coller unha baixa, iso si, faino para volver este setembro con máis forza que nunca. Chamádeme tolo, pero creo recordar que noutros programas cando o seu condutor ou condutora non pode asistir, buscan alguén que o substitúa para que a programación continúe. Este non foi o caso do Lume na Palleira, nen do noso Recuncho. Así, quedamos sen o noso espazo durante toda a tempada. Emilio e o seu programa, son un pobo galo como o de Asterix e Obelix, un exemplo de resistencia desde o ano 96. Sufriron multitude de cambios, deixaron de estar na canle principal da Radio Galega. Durante varias tempadas, podíamos escoitar o Lume os sábados e domingos, agora xa non, agora só podemos sintonizalos o último día da semana en Radio Galega Música. En setembro recuperaremos o noso espazo, e volverá Emilio dar cabida na radio ao folk, á música en galego, e no que máis nos afecta a nós, volveremos ter música tradicional nas ondas. Grazas compañeiro, por sempre abrirnos as portas da canle pública, por non poñernos trabas e tentar facer todo máis sinxelo, nin imaxinas o que te votamos de menos. Agora queremos respostas. Por que non se buscou continuidade do Lume nesta tempada?