Orquestra Jazz de Matosinhos

No século pasado, mentres aquí estabamos sumidos na “longa noite de pedra”, Portugal estaba a desenvolver unha das tradicións jazzísticas máis sólidas de Europa. En 1945 xa había un notábel movemento entre os amantes desta música e xa comezaban a sentar as bases do que daría nacemento, en 1950, ao Hot Clube de Portugal: o clube de jazz en activo máis vello de Europa. Por esta sala, nos seus comezos, pasaron algúns dos nomes máis importantes do jazz americano, como Count Basie ou Sidney Bechet; así como músicos que estaban de paso e artistas locais. Alén da actividade artística o Hot Clube funcionou como a primeira escola profesional de jazz de Portugal formando as primeiras xeracións de músicos do país. Segue activa a día de hoxe. A boa saúde do jazz no país veciño, a grande tradición desenvolvida, o apoio institucional e o interese do público por este estilo deron como resultado a aparición dun gran número de proxectos dunha altísima calidade. Hoxe imos falar dun dos máis interesantes: a Orquestra de Jazz de Matosinhos. Esta orquestra, que puidemos escoitar o pasado día 19 de novembro no Festival Internacional de Jazz de Lugo, é unha institución sen fins lucrativos que ten por obxectivo promover a creación, a investigación, a divulgación e a formación na área do jazz. Creada en 1997, cumpre o papel de Orquestra Nacional de Jazz de Portugal. Ten colaborado con artistas como Maria Schneider, Carla Bley, Lee Konitz, Kurt Rosenwinkel, Mark Turner, Steve Swallow, Chris Cheek, Joshua Redman, Fred Hersch, etc. En 2014 iniciou o Ciclo Novos Talentos do Jazz onde convida mozos músicos a tocaren como solistas á cabeza da Big Band. En 2019, na 11ª edición deste ciclo, convidou por primeira vez un novo músico catalán, ampliando a partir de entón o proxecto a toda a península Ibérica. A OJM ten tocado en Barcelona (residencia de catro anos no VollDamm Festival Internacional de Jazz de Barcelona), Belgrado, Bruxelas, Marsella, Viena, Milán, Boston e Nova York. A discografía da OJM é o reflexo dalgunhas das súas colaboracións máis sólidas: Orquestra Jazz de Matosinhos Invites Chris Cheek (Fresh Sound New Talent, 2006); Portology, con Lee Konitz como compositor e solista principal (Omnitone, 2007); Our Secret World con Kurt Rosenwinkel, lanzado nos EUA e en Portugal (WomMusic, 2010); entre moitos outros. Desde 2018, a orquestra ten a súa nova casa na Real Vinícola en Matosinhos. É alí que está instalado o Centro de Alto Rendemento Artístico (CARA), que non é só unha editora mais tamén un espazo con 800 m2 onde se promove o diálogo entre arte, ciencia e tecnoloxía a través de proxectos multidisciplinares. Este espazo acolle concertos, ensaios, gravacións e iniciativas do Programa Educativo da OJM. E todo isto, a pouco máis dunha hora de Galiza…