O extremo coidado

Hai unhas semanas chegoume este disco, que ten un dos formatos máis coidados que nunca vin: unha lata de conservas que puña “Peixe, Xisco Feijóo”. (Decatádevos, ei, de que eu este ano saquei álbum coas miñas compañeiras de Timparrantela, que estou até botando pedras contra o meu propio tellado). Estiven mirando, dándolle voltas, pareceume tan fermoso que até gravei unhas stories para o Instagram, amosándoo. Pero por máis que o tentei, non atopei a forma de abrilo e tiven que consultarlle ao propio Xisco. Resulta que non era unha simple empulación: tiña que abrilo tal como unha lata de conservas! No interior, abrindo a tapa, vén un despregábel coas letras. Un deseño comedido e elegante de Jose Comesaña, perfecto para este produto. Por suposto, se o aspecto exterior se coidou até este extremo, non ía quedar atrás o interior. Que parece que me atrapou tanto a latiña de conservas que me esquecín de que aquí o principal é a música! Sobre o leimotiv deste traballo, o propio artista explica: Peixe está preñado da esencia máis fonda da música tradicional, vista desde unha mirada contemporánea e interpretada desde a modernidade e desde a visión dun século XXI dominado polas novas tecnoloxías pero onde se respectan e valoran con emocionante orgullo as orixes e tradicións máis puras e ancestrais. De Xisco xa coñeciamos as súas enormes dotes musicais, a súa persoal voz, o seu talento, o seu bo gusto. Ademais del, os músicos que o acompañan son: Artur Puga (percusións, voz e danza tradicionais), Martiño Malleiro (acordeón, clarinete e voz), Carlos Quintá (Violín, sintetizador, percusións e voz tradicionais) Xan Pérez (ventos, percusións, voz e danza tradicionais), Xosé Liz (arranxos bouzuki, requinta, mandolina, percusións e voz tradicionais), José Manuel Díaz (Contrabaixo), Miguel Fraile (Guitarras Española e eléctrica) e Iago Ramilo (Saxo soprano, barítono e alto, percusións e voz tradicionais). E, ollo, porque nas colaboracións (que son unha chea delas, moi interesantes) temos a Alasdair Fraser e Natalie Haas… Case nada! As pezas pasan desde o máis tradicional da música galega até achegamentos a outras culturas ou incluso con algunhas instrumentacións máis modernas. É un disco alegre e desenfadado, que dá moi bo xorne. Sen complicacións innecesarias pero non por iso simplista, en absoluto. Diría que é un disco tan redondo como a caixa metálica que o envolve. Parabéns a Xisco e ao resto do equipo. E a vós dígovos que se queredes investir nun produto que sabedes de certo que se fixo con todo o cariño… Facédevos cun Peixe canto antes! Todos me din que me case, pero non me din con quen. Eu casar ben me casaba si a vida de casadiño fora quedar como estaba. Peixe Xisco Feijoo / autoeditado / 2021 / 10 pezas / 23 euros