A mensaxe de Ultramar

Wöyza, viguesa con raíces uruguaias, é unha das pioneiras do hip-hop e soul ibéricos e leva máis de vinte anos deleitándonos coa súa música. Ese afán creativo, o seu gran talento e a súa calidade de líder conflúen nun proxecto compartido chamado Wöyza &amp; the Messengers. E quen son estes "mensaxeiros"? Wöyza &amp; the Messengers nace en 2018 da mestura de músicas cunha orixe moi distinta. Niso reside a forza e riqueza do seu proxecto. Vigo como epicentro, capital cosmopolita que recibe as mensaxes sonoras e culturais dende todas as partes do mundo, para logo adaptalas á súa realidade e darlle forma en novos sons. A idea non é fusionar estilos musicais, máis ben, fusionar personalidades para facer un proxecto que emana realidade en cada tema. Os seus dous primeiros singles poñen o lazo a un proxecto experimental que ten nos seus directos a maxia de quen sabe o que fai. É un novo chanzo na carreira de Wöyza que pon todo o seu corazón traballando temas que representan diversas etapas da súa vida. A intención era seguir medrando a través da experimentación cooperando entre músicas diversa (pop, folk, electrónica, soul, hip-hop). O resultado é unha nova experiencia sonora integramente en lingua galega. Aquí vese claramente o que é a Galiza contemporánea. Unha Galiza que emigrou e segue a emigrar, que dá, pero que tamén recibe persoas de diferentes culturas que se adaptan á nosa realidade, danlle forma e contribúen a que medre. Esta banda recolle a esencia das músicas propias de aquí e doutras latitudes para transformalas facendo temas propios. E fano coa calma e o amor que require un proxecto tan real como este. Para elaborar o seu repertorio baséanse na música tradicional máis clásica como a coñecida "Unha noite na eira do trigo", trasladada ao mundo do soul e do hip hop, ou como algunha das pezas de Martín Códax que a propia Wöyza arranxou pra levala ao seu terreo. Esta é a mensaxe sonora de Wöyza &amp; the Messengers, unha mensaxe de ida e volta, na que se fusionan personalidades musicais con moita forza. David Outumuro, High Paw, María Faltri, Jorge Juncal, Xulio Lorenzo, Yara Juncal, Héctor Agulla ou Berto Brañas forman, con Wöyza á fronte, esta banda que vén para quedar. Este pasado xoves veñen de abrir o Marisquiño en Castrelos cun concerto impecábel no que tamén soaron temas da dilatada carreira de Wöyza, iso si, readaptados ao estilo dos Messengers. Poderedes velos hoxe de novo en Baiona no cabo Silleiro ás 20 horas, nun concerto e entorno que promete ser unha experiencia sonora e visual única. Para min é unha novidade que non perderei de vista, desexando escoitar máis temas e especialmente poder gozar dos seus directos. Mais para a cultura galega é un feito a festexar que exista un novo proxecto na lingua propia cunha idea tan potente no seu interior.