Melodías tropicais para o século XXI

Precisamente iso foi o que acadou Ana Frango Elétrico ao achegarse aos sons da samba dende outra perspectiva, traendo consigo melodías do pop e do jazz que converten a Little Electric Chicken Heart nun fantástico álbum cheo de luces no que a música fala por si mesma. Little Electric Chicken Heart | Ana Frango Elétrico | 2019 | Nove pezas | 10 euros Ana Fainguelernt dérase a coñecer en 2018 co lanzamento de Mormaço Queima, un colorido disco que publicou aos seus 20 anos, onde sentou as bases para este segundo traballo que chegou só un ano despois. Como xa fixeran João Gilberto co jazz ou Os Mutantes coa psicodelia, Little Electric Chicken Heart pon en común todos estes xéneros de maneira maxistral, mantendo a cohesión estilística en todo momento e dotando de enerxía ás súas composicións. Ao longo das nove pezas que compoñen o último disco de Ana Frango Elétrico pódense escoitar guitarras da man de instrumentos de vento, servindo como unha base perfecta para a voz de Ana Fainguelernt. A proposta de Little Electric Chicken Heart funciona tanto nas cancións máis pausadas, baseadas nas súas fermosas melodías, como naquelas máis enérxicas, onde os ritmos e as percusións toman o protagonismo principal. O comezo con "Saudade" fai uso de elementos da bossa nova mediante unha longa improvisación ao que é un dos momentos menos pop do disco. Porén, a música de Ana Frango Elétrico resulta tremendamente divertida e mesmo pegadiza grazas á súa vitalidade e a súa excentricidade. Máis adiante, as guitarras gañan protagonismo en pezas como "Tem Certeza?" onde suben as revolucións, cun son rockeiro mais movéndose sempre nas marxes estilísticas que definen este traballo. As letras de Little Electric Chicken Heart non seguen unha temática moi marcada dentro do propio disco, e en ocasións mesmo en cada unha das cancións que o compoñen. Trátase dun traballo que semella fuxir do conceptual para abrazar a sinxeleza. Se algo procuraba conseguir Ana Fainguelernt con este disco era ofrecer unha experiencia interesante e divertida dende o propio plano musical, algo que acadou con creces. Ademais das melodías e as interpretacións desta nova cantante brasileira, unha boa parte das razóns que fan que este traballo funcione tan ben é a instrumentación dos músicos que a acompañaron, como Guilherme Lírio á guitarra, Marcelo Callado á batería, Grandfather Bebê no baixo, Antônio Neves ao trombón, Eduardo Santana á trompeta e Marcelo Cebukin no saxofón.