Jazz para debutantes

No artigo de hoxe traemos unha selección de discos para aquelas persoas que non escoitan jazz, que non saben por onde comezar a iniciarse ou que pensan que é un xénero demasiado "intelectual" ou aburrido. Se xa escoitas jazz é moi probábel que coñezas todos estes traballos. É unha escolla moi subxectiva, faltan moitos discos históricos, moitos músicos importantísimos e o único criterio para a selección é que cremos que, alén de ser álbums marabillosos, tamén son moi accesíbeis para o gran público non versado no estilo. Django Reinhardt - The Best Of Comezamos polo que moitos consideramos o músico máis grande de todos os tempos. Django foi un cigano nómade que desenvolveu a maior parte da súa actividade en París. Soubo levar o jazz, que coñecía polos discos que chegaban de Estados Unidos, ao seu instrumento e á súa linguaxe, dando nacemento ao que hoxe coñecemos como Jazz Manouche. Xunto ao violín de Stéphane Grappelli, dúas guitarras rítmicas e un contrabaixo, creou Le Quintette du Hot Club de France. Django ten unha das discografías máis extensas da historia do jazz. Se queres afondar, recomendamos a colección de 20 discos: Djangologie. Ella Fitzgerald and Louis Armstrong - Ella and Louis Este é un álbum absolutamente delicioso de principio a fin! Armstrong é un dos pais do jazz, pioneiro e peza clave no desenvolvemento do swing. Ella Fitzgerald, a primeira cantora quen de levar á voz a sofisticada linguaxe improvisatoria do be-bop. Para coñecer un pouco máis, recomendamos Ella and Louis Again e The Complete Hot Five &amp; Hot Seven Recordings de Louis Armstrong. Benny Goodman - The Famous 1938 Carnegie Hall Jazz Concert Trátase do rexistro dun concerto que resultou nunha das maiores festas da historia do jazz. Todo un evento, dado que nunca antes se tocara este xénero nese templo da música académica que é o Carnegie Hall. O disco inclúe jazz de diferentes estilos e swing a esgalla! Contén composicións fermosísimas, solos marabillosos e moito ritmo, cunha das mellores Big Bands da historia. Nun formato máis reducido, talvez poida interesarche Benny Goodman Sextet. Charlie Parker - Charlie Parker with Strings Este pode que sexa o disco máis "duro" da selección, mais non podíamos deixar fóra un dos máis grandes músicos do xénero, responsábel -xunto a Dizzy Gillespie, Charlie Christian, Thelonious Monk, etc- do desenvolvemento do be-bop que é a base da práctica totalidade do jazz posterior. Se gostas desta música, achégate a The Best of the Complete Savoy and Dial Studio Recordings (1944-1948). Miles Davis - Kind Of Blue O álbum de jazz máis vendido da historia. Unha auténtica alfaia. Miles mudou a historia do jazz varias veces e este disco é unha obra mestra. Ten todo: lirismo, swing, blues, enerxía… e moita poesía. Reúne algúns dos músicos máis influentes deste xénero. Non se nos ocorre unha mellor recomendación para iniciarse no estilo. Outro álbum co que podes continuar é Relaxin' with the Miles Davis Quintet. Na segunda parte desta selección, seguiremos con discos un chisco máis recentes. Agardamos que gostedes desta primeira escolla!