A gaita non chega aos estudos de máster

N un dos capítulos aos que vos temos acostumadas sobre o desleixo que amosan distintas institucións públicas e privadas, comentabamos xa hai tempo a decisión da Consellería de Educación liderada por Carme Pomar de non promover a creación de novos departamentos de gaita e música tradicional nos conservatorios públicos de Pontevedra, Santiago de Compostela e A Coruña, co demagóxico argumento de haber nesas cidades centros privados que ofertan esta especialidade. Este novo capítulo non só vén da man da Consellería de Educación, agora con Román Rodríguez, senón coa complicidade da dirección do Conservatorio Superior de Música de Vigo e a Axencia para a Calidade do Sistema Universitario de Galicia. Esta semana celebraban en redes sociais a creación duns novos estudos de nivel 3 no MECES, tamén coñecido como mestrado, no que das 42 prazas que se ofertan, 30 van destinadas a interpretación musical. Entrando nas especialidades, atopamos as habituais como violín ou piano e outras non tan comúns que ata teñen quedado desertas na oferta do nivel de grao por non teren ningún matriculado, pero non aparece por ningún lado Instrumentos da Música Tradicional e Popular (IMTP), habitualmente coñecida como gaita. Chama a atención como de todas as especialidades de interpretación que se ofertan no conservatorio, música tradicional xunto con trombón son as únicas que non teñen oferta no máster, co que demostran unha absoluta falta de respecto pola nosa cultura, e o que é mais grave, actúan como unha administración empeñada en desgaleguizar o país, desaproveitan máis unha vez a posibilidade que teñen de normalizar Galiza. Tanto a Consellería de Cultura e Educación como o CSM de Vigo, con esta decisión non avogan por unha profesionalización da nosa música tradicional. Agora virán as xustificacións ás cales xa nos imos adiantar. Xa existen doutoras en música tradicional, con estudos do máximo nivel e formación en moitos casos máis extensa que noutras especialidades. Temos gaiteiras e gaiteiros con currículos abraiantes non só no interpretativo mais tamén no formativo. A resposta social a esta cuestión, expresouse nunha reunión entre alumnos, ex alumnos e profesorado da especialidade de IMTP na cal participou a Asociación de Gaiteiras e Gaiteiros Galegos (AGG) na que se acordou reclamar á Comisión Académica do máster unha explicación polo acontecido. Compre destacar que o departamento de IMTP, así como o colectivo de gaiteiros e gaiteiras levan tempo reclamando a creación dun máster especializado en interpretación de gaita galega, que sería o primeiro específico para o instrumento. Dito departamento tamén aclarou na reunión que a directiva do Conservatorio era consciente da exclusión desta especialidade e non fixo pública a casuística ata a publicación no BOE para sorpresa de todas nós. Xa non teñen desculpa posible. Esiximos e agardamos a rectificación por parte da Comisión Académica do máster a través da inclusión da especialidade de gaita.