Febem – Jovem OG é unha razón máis para explorar a música brasileira

Di o Kyan, chegados á canción “Balla”, no meridiano do disco Jovem OG, que desde pequeno tivo talento. E sen saber moito da súa vida, até nos podemos atrever a dicir que si. Igual que o podemos dicir Jean Tassy, Djonga, Tasha e Tracie e, por suposto, do autor do álbum, Febem. Reino Unido exportou o drill. Ante un mundo do hip hop de loito pola aparente morte do trap a nivel mundial, pero con ganas de que o estilo de música sexa recordado, extremar sons parecía unha das saídas máis sinxelas e efectivas. E non é algo exclusivo do Reino Unido, nin este álbum de drill brasileiro é unha excepción, ollo! Shawny Binladen non deixa de experimentar co son do estilo na súa vertente máis estadounidense, ASHE 22 versou sobre os seus ritmos en francés, e mesmo aquí na Galiza os FØ Records poderían ben ser a envexa de moitos que experimentan no estilo. O drill, a diferenza do trap, non se interesa tanto na procura de ritmos que nos leven ao sétimo ceo. Queda con algún elemento do que lle deu forma, pero é aquel xa pasado de moda gangsta rap nado nos anos 80 o que lles presta o seu elemento máis distintivo. No drill hai sons monótonos, agresivos, violentos, directos. E, con estes sons, unha nova xeración busca contar as súas vivencias. E é preciso este apuntamento porque, grazas a isto, podemos tentar entender mellor a sensación de fastío que reina ao longo de toda a lírica do álbum. Xente nova, cunha xuventude partida por unha pandemia, que usa a música como maneira de evadirse dun futuro incerto. Sóanos? Pois si... Porque levamos desde a xeración millenial vendo cousas así. Excepto polo da pandemia mundial. Jovem OG / Febem / 2021 / Dispoñíbel en plataformas dixitais Pero outras xeracións tiveron movementos musicais dos que se falaron unha e outra vez. Aínda que sexa para criticalo, todo o mundo dixo algo do trap. Foi un fenómeno mundial, creado para esas xeracións fartas e perdidas que agora se achegan aos 30 anos ou xa incluso os superan. Pero pasou. Acabouse. E o drill é consecuencia directa desa morte. O trap foi a causa e hoxe estamos a vivir a consecuencia. Unha fase de loito na que só queda berrar, erguer a cabeza e continuar. Con todo, o de Febem e compañía non é só estar no momento adecuado. A día de hoxe, moitos fan drill. Con tanto éxito, non. Jovem OG está ben executado, e trae consigo moitos e diferentes ritmos nos que estes novos artistas brasileiros deixan sempre unha pegada de calidade. Sempre con pequenos detalles humorísticos que dan un corpo sarcástico moi necesario. Jovem OG é unha oportunidade máis para coñecer a música brasileira. Para coñecer voces que nun futuro poderían encher moitas máis liñas que estas. Para volver darse conta de que, alá no outro lado do charco, a creación cultural nin quere cesar nin vai deixar de sorprender. E sempre cun toque característico. Balea.org