Directo desde o corazón do underground

O punk, a no wave e os experimentos underground máis provocadores dábanse cita no Mudd Club de Nova York, que se mantivo en funcionamento desde 1978 até 1983. A súa particularidade consistía en non ser exactamente unha discoteca nin unha sala de concertos, senón un espazo onde convivían manifestacións creativas de todo tipo, da performance ao cine experimental, pasando pola música e as artes plásticas. Nel podía encontrarse a Jean-Michel Basquiat, Jeff Koons, Keith Haring, Robert Rauschenberg, Johnny Rotten, William Burroughs, Kenneth Anger, Marianne Faithful, John Lurie, David Bowie ou Adam Ant. Creatividade e desenfreo mesturábanse de tal maneira que afloraban as comparacións cos cabarés berlineses da década de 1920 e mesmo co Cabaret Voltaire de Zurich. Frank Zappa adorou o sitio desde que o coñeceu: a fauna reunida alí cada noite proporcionaba gasolina para a súa ironía desmitificadora. E algo máis debeu ver no club cando se amañou para tocar nel en paralelo aos concertos en grandes auditorios. Sae agora ao mercado un disco no que se recolle a actuación de Zappa no Mudd Club o 8 de maio de 1980, cunha banda que incluía o duo vocal de Ike Willis e Ray White, Arthur Barrow no baixo, Tommy Mars nos sintetizadores e David Logeman na batería. Son 15 temas procedentes dos recentes Sheik Yerbouti e Joe's Garage, pezas logo inseridas nos álbums You Are What You Is e Tinseltown Rebelion, ademais de repescas como "Chunga's Revenge" ou "I Ain't Got No Heart". Antes de saír de xira, Zappa ensaiaba durante cinco meses, cinco días á semana, oito horas ao día, o que explica a perfecta solidez dunha banda que era quen de desenvolver os complexos conceptos musicais que o compositor creaba pensando en grupos orquestrais con só seis intérpretes. Se a iso lle engadimos as avanzadas ideas que experimentaba en directo e o corrosivo sentido do humor que formaba parte da marca da casa, temos un espléndido concerto que marcou unha etapa de transición na carreira do xenial e irrepetíbel músico. Despois dos eternos conflitos coas discográficas, Zappa creara o seu propio selo en 1979, Zappa Records, para editar dous dos seus grandes proxectos: Sheik Yerbouti e Joe's Garage. Seguirían, xa en 1981, tres instrumentais que mostraban a súa capacidade improvisadora (a serie Shut Up 'N Play Yer Guitar), Tinseltown Rebelion -que podía mesturar técnicas vogais como o Sprechstimme de Schöenberg e Alban Berg con incursións no reggae- e You Are What You Is, un álbum de sardónica crítica social. Todo iso aparece neste concerto executado ante unha audiencia máis que aberta ás experimentacións e irreverencias do músico de Baltimore. Un disco con infinitos matices para gozar.