Avances e mudanzas no panorama musical galego actual, unha achega desde o ámbito educativo

Vivimos no panorama musical galego un momento de máximo apoxeo no que a música está en continua transformación e desenvolvemento, avanzando, medrando, fusionándose e actualizándose. Abandeiran este proceso de renovación e cambio multiplicidade de artistas e proxectos de todos os estilos, formatos e sensibilidades artísticas que fan do noso sector musical un referente a nivel estatal e internacional. O eido da educación, e en particular da educación musical, non é alleo a estas mudanzas, senón que está sabendo acollelas e nutrirse delas; mesmo en moitos casos pode evidenciarse como camiñan da man. Procurando darlle visibilidade e resultar un espazo de encontro entre diversos ámbitos da educación e, aínda, dunha parte da pluralidade de estilos musicais que converxen no marco galego, a Revista Galega de Educación (RGE) -que comeza a editarse no 1986 promovida polo Movemento de Renovación Pedagóxica Nova Escola Galega- vén de publicar o seu último monográfico (número 86) centrado nesta cuestión baixo o título Andar cos tempos das músicas. O título do monográfico, alén de beber do dito popular "andar cos tempos", inspírase no proxecto homónimo impulsado dende o ano 2015 polas bailadoras, educadoras e mestras Carme Campo e Chus Caramés, a través do que convidan a revisar a tradición galega con perspectiva de xénero. É precisamente o artigo relacionado con este proxecto o que abre o número, seguido do texto que atende ao proxecto didáctico Sinfonía Romaría. Aínda, O eixo do Jazz e a promoción que desenvolve en chave musical e pedagóxica desde o ámbito asociativo; o Arquivo do Patrimonio Oral da Identidade do Museo do Pobo Galego; a achega aos proxectos Músicas galegas ilustradas e Ferreñas &amp; Rock and roll; algunhas ferramentas de escoita, autodefensa e coidados a través da improvisación oral; unha proposta de aplicación didáctica das músicas de Fillas de Cassandra; a cohesión comunitaria con PanSenFron; tres experiencias que incardinan música, emocións e redes sociais; unha ollada á educación musical inicial na formación do profesorado, así como o artigo ligado á rede de centros de ensinanzas musicais, configuran o Monográfico que compón o número xunto coas diferentes seccións: Entrevista a Mercedes Peón, Experiencias, Atención á Diversidade, Lingua, Educación no rural, Novas tecnoloxías, Investigación, Xoguetainas e Brinquetainas, Nais e pais, entre outras. Con Andar cos tempos das músicas a RGE pretende dar voz, visibilizar e reflectir un "andar cos tempos" non só das músicas e músicos de todos os estilos, propostas e linguaxes musicais, senón de todas as persoas ligadas ao ámbito educativo que procuran andar cos tempos do compás desexábel ao momento que vivimos. Fica evidenciada nel a vontade de compor as harmonías necesarias para favorecer unha cidadanía responsábel, reflexiva, crítica, xusta, comprometida e solidaria, a través da promoción dunha educación, dunha música e dunha educación musical galega e en galego, pública, inclusiva, feminista, democrática e laica.