Amor pola música

Papá é mariñeiro. Onte chegou do mar especialmente feliz. Por fin, despois de moitas semanas lonxe, cheirando a atún e a océano, correu ao meu cuarto para me espertar. Así comeza a historia de Un día con papá: o libro cd de Víctor Castro (música) e Fina Casalderrey (letras). Un día con papá / Víctor Castro e Fina Casalderrey / Embora / 2021 / 10 pezas / 20 euros Este traballo comezou a xestarse hai moito tempo, pouco despois da primeira incursión de Víctor na música infantil con Tambo (2013, edicións do Cumio). Neste Un día con Papá tamén hai unha manchea de colaboracións: Juan Froján Castro (voz), Miguel Froján Castro (voz), Elvira Martínez Otero (voz), Alejandro Pazó Castro (voz), Pablo Mata Castro (voz), Miguel Guerra Filgueira (contrabaixo), Marta Valbuena Aguado (voz), Miguel Túñez Area (voz) e Ricardo López Rouco (programación de baterías). Hai dúas que para min destacan excepcionalmente: a fermosa voz de Montse Ogando e o flow e a forza de Diana Tarín, que ademais de voz, gravou teclados. Non paramos de falar en toda a mañá. Despois de xantar, papá e mais eu vestímonos con roupas de domingo, fixemos uns bocadillos e saímos botar a tarde fóra. Dende a eira saudounos a avoa Pepa, que xa andaba a apañar nas verzas para as galiñas. É imposíbel pensar en traballos de Víctor sen saber que irá acompañado da súa filla Ánxela Castro: a nena saíulle con talento e xuntas comparten o amor pola música nestes proxectos. De feito, na peza "Lúa Chea" Víctor aproveitou que Ánxela gravara as voces polo 2014 e combina a súa voz de peque coa voz que ten agora na adolescencia. Ambos timbres igual de lindos, todo sexa dito. Collidos da man, en silencio, fomos afastándonos da dorna, do peirao e do mar. Eu levaba a cara pintada das cores da pena. Pensaba no avó Paco… Papá tamén levaba os ollos tristes. E, aproveitando que xa era noite pecha, argallou unha canción de meter medo. Sabe que son as que máis me divirten. As ilustracións son de Paula Andrade e acompañan a historia que se vai contando. É un traballo sinxelo, coa mesma esencia que tiña Tambo. Ademais, en Youtube están os vídeos de todas as cancións (que rematarán de subirse en abril: están colgando unha cada semana). Destaco a peza "A Banda da Lura Pilar", que ten moitas personaxes, cada unha coa súa voz e a súa personalidade. Parabéns a Fina polas letras riquiñas e a Víctor e Ánxela polas músicas! Paco Mariñeiro ten unha dorna con velas da cor da prata, o vento ousado do mar sópralle unha serenata. A dorna, que era un veleiro, chama ao vento: mentireiro! Paco Mariñeiro ten un… veleiro!