"Actualizarse para seguir espertas"

En calquera traballo é fundamental manterse ao día, estar ao tanto de todas as novidades, o que se chama actualizarse, vaia. O mundo parece xirar ao redor desas actualizacións. Se tes un ordenador ou un teléfono móbil sabes do que estou a falar, somos escravos desa frase: "Desexa vostede descargar a nova actualización?". No mundo da música actualizarse é fundamental porque se te despistas igual perdes oportunidades laborais. Abrazar a novidade non debía ser algo complicado mais ás veces, actualizarse non é tan doado. Falaba disto o outro día cun compañeiro, e é que sentimos demasiado apego polas cousas, polo xeito de facer esas cousas, ou pola rutina. Ese apego pode volverse incluso algo tóxico, sobre todo cando a emoción nos ata a esa rutina. Dicirlle a alguén que cambie o seu xeito de facer algo pode ser motivo dunha discusión, e todo vén dado polo apego emocional que esa persoa sente polo propio proceso. No mundo da música é moi común que bandas de gran traxectoria non cambien nunca de son ou de etiqueta musical, xa que esa comodidade, esa rutina, é o que as mantén vivas, e tamén forma parte do seu éxito. Esas bandas son chamadas popularmente "funcionariado musical", non che van entregar novidades, non te van sorprender, pero si proporcionan a calidez da rutina. A min persoalmente, o que máis me admira dun artista ou dunha música é a capacidade de actualizarse, de ofrecer sempre ao público algo novo, algo que está pegado ao momento, á propia vida. Por iso creo que darlle unha volta á música que escoita a xente nova é algo que a nós, que temos uns poucos de anos máis, nos mantén espertas. Penso agora en Verto, en Grande Amore, en Ortiga, en Moonqup… Dentro destas novidades, hoxe veño falarvos dunha banda que para min ten un magnetismo irresistíbel: Momboi. As súas músicas, incesante mestura de ritmos latinoamericanos, cadran moi ben en galego, e as súas letras escuras e con certo carácter místico, fan que queiras escoitar ese disco unha e outra vez. Unha banda que consegue a orixinalidade, e unha tremenda sensualidade que nos han proporcionar un "Inverno cheo de cores" como di unha das súas cancións. Non quero pasar sen falar doutra formación que cada vez sorprende máis, Chicharrón. Levan anos ofrecendo distintas perspectivas da electrónica elegante que fan. O disco Unha fogueira intacta, lanzado este mesmo ano baixo o selo de Ferror Records, ofrece cancións de atmósferas escuras e oníricas, de sons eléctricos e unha lírica envolvente. "Outono de fíos eléctricos" é un dos temas que podedes escoitar en todas as plataformas e acompañar así os derradeiros solpores deste verán. Chicharrón Unha fogueira intacta / 2021 / Ferror Records / Once pezas / 15 euros