25 anos de jazz en Ourense

Coñecido por cada amante do jazz en Galiza, o Café Latino leva xa 25 anos na trincheira do jazz en Ourense. Resistindo, con moita ilusión e pouca axuda institucional. Polo palco do Café Latino teñen pasado algunhas das figuras máis salientábeis e incluso históricas do jazz internacional, nomeadamente Ron Carter, Ray Brown, Benny Golson, Hank Jones, Mark Whitfield, Russell Malone, John Scofield, Mike Stern, Jorge Pardo, Roy Hargrove, e un longo etc. Nesta edición, no seu 25º aniversario, semella que queren tirar a casa pola xanela cun programa excelente. A continuación, damos un repaso aos concertos que van ter lugar a partir de hoxe: O vindeiro 1 de maio actuará Kenny Barron, músico histórico, que tocou con Philly Joe Jones, Roy Haynes, Dizzy Gillespie, Stanley Turrentine, Freddie Hubbard, Milt Jackson, Jimmy Heath, Buddy Rich, etc. Nesta ocasión non trae o seu habitual trío de jazz con contrabaixo e batería, senón que vai tocar a piano solo. O 3 de maio terá lugar un dos concertos máis agardados polo público: Kenny Garret Sextet. Gañador dun Grammy en 2010 e nomeado a dito premio até cinco veces, tocou con músicos como Freddie Hubbard, Woody Shaw, Art Blakey &amp; The Jazz Messengers ou Miles Davis. A seguinte data, o mércores 10 de maio, será con Bruce Barth Trio. Un dos pianistas máis importantes das últimas décadas. Tocou con músicos como Stanley Turrentine ou Terence Blanchard, participando na banda sonora do filme Malcolm X de Spike Lee. O 15 de maio, o Canadian Jazz Collective, liderado por Kirk MacDonald (saxo), Derrick Gardner (trompeta) e Lorne Lofsky (guitarra), interpretará temas orixinais destes tres músicos en formación de sexteto. O xoves 18 de maio teremos a oportunidade de gozar do cuarteto de Jesse Davis, músico de Nova Orleáns cunha linguaxe be-bop que fará as delicias dos amantes da tradición, que nesta ocasión vén acompañado dalgúns dos mellores músicos da escena catalá. O 25 de maio teremos a visita do saxofonista Wayne Escoffery, que á súa curta idade xa ten un currículo impresionante. Ten tocado con músicos coma Ron Carter, Al Foster, Billy Hart, Rufus Reid ou Herbie Hancock. Nesta ocasión vén acompañado do gran pianista David Kikoski, o baixista Ugonna Okegwo e Mark Whitfield Jr. (fillo do famoso guitarrista que tamén pasou polo Latino). Por último, o 1 de xuño, teremos o Ton Risco &amp; Alfonso Medela Quinteto. Unha formación que reúne cinco dos máis sólidos valores da escena ourensá e que apunta ser un concertazo para non perder! O do Café Latino é extraordinario. Ofrece a oportunidade de escoitar proxectos que normalmente tocan para milleiros de persoas, nunha sala á que se achegan uns cen ouvintes. A maxia que se xera é algo que só pode acontecer nun ambiente destas características, onde os músicos poden sentir a enerxía da audiencia e viceversa. É preciso destacar a calidade do público do Latino, respectuoso e agradecido. Só falta recomendar, a todas as persoas amantes da música, que se acheguen ao Latino. Vémonos en Ourense!