Impunidade de militares golpistas

O pasado 16 de novembro, coincidindo coa investidura de Pedro Sánchez como presidente de Goberno, un grupo de militares na reserva publicaba un manifesto difundido a través da web da Asociación de Militares Españois (AME): "Pedimos aos responsábeis da defensa do ordenamento constitucional a destitución do presidente do Goberno e a convocatoria de eleccións xerais", é dicir, chamaban a un golpe de Estado do Exército. O xeneral de división Yago Fernández de Bobadilla Bufalá, encabezaba o manifesto e entre os 51 asinantes estaban algúns dos participantes naqueles chats que manifestaban: "Non queda máis remedio que fusilar 26 millóns de fillos de puta". Antecedentes Unha parte do Exército sublevábase en 1936 contra o Goberno lexitimo da República. Durante corenta anos esas Forzas Armadas foron a garantía dunha ditadura criminal e despois controlaron a chamada transición da ditadura á democracia. Estamos a vivir un guión escrito hai moitos anos cando o ditador Franco manifestaba en 1962 nunha concentración de alféreces provisionais: "Detrás de mi todo quedará atado bajo la guardia fiel e insuperable de nuestro Ejército". Cando designa Juan Carlos de Borbón como o seu sucesor, xustificaba así a súa decisión: "Para que todo quede atado y bien atado para el futuro". Juan Carlos I lexitimaba o golpe de Estado de 1936 e no seu discurso ante as Cortes o 23 de xullo de 1969 manifestaba: "Recibo de su Excelencia el Jefe del Estado y Generalísimo Franco, la legitimidad política surgida del 18 de julio de 1936". Por iso o xeneral Juan Chicharro, que foi Axudante de Campo do rei Juan Carlos I, e actual presidente da Fundación Nacional Francisco Franco, certificaba así a orixe da actual monarquía: "El actual sistema democrático no tiene otra legalidad y legitimidad que la procedente del Régimen de Franco". A partir de aí asistimos a un protagonismo continuado da Forzas Armadas, tanto na redacción da Constitución, como en forzar a renuncia do presidente Adolfo Suárez. O tenente xeneral José Mena manifestaba na Pascua Militar de 2006: "Es nuestra obligación alertar de las graves consecuencias que tanto para las Fuerzas Armadas como institución como para las personas que las integran podría conllevar la aprobación del Estatuto de Cataluña en los términos que está planteado". Intervención que non condenaba o PP e Gabriel Elorriaga, responsábel de Comunicación, manifestaba que as palabras de Mena eran "el reflejo de la situación que estamos viviendo" e que era "inevitable que se produzcan pronunciamientos de todo tipo". Militares franquistas na reserva (65 xenerais, 7 almirantes, 30 capitáns de navío, 2 capitáns de fragata, 374 coroneis e tenentes coroneis, 48 comandantes) facían pública en agosto de 2018 unha Declaración de respeto y desagravio al general don Francisco Franco Bahamonde, soldado de España, que xustificaba a sublevación de 1936: "Llegado aquel momento crucial para la supervivencia de la Nación española, asumió la responsabilidad que le entregaron sus compañeros de Armas para ejercer el Mando único de la España agredida y asediada por el comunismo internacional aceptado y adoptado por el Frente Popular". E non pasa nada. A ministra de Defensa non fixo nada ante os manifestos franquistas e golpistas e Felipe VI calou Franquismo subvencionado polo Estado A Asociación de Militares Españoles (AME) forma parte do Consello de Persoal das Forzas Armadas (Coperfas). Recibía unha subvención de 5.000 euros de María Dolores de Cospedal cando era ministra de Defensa. AME fai apoloxía do franquismo e edita a revista mensual Militares, onde son frecuentes as loas ao ditador Franco e críticas ao Estado das Autonomías: "Parcelación de España en 17 virreinatos, que no ha traído a España más que división, corrupción y enormes gastos". Esta asociación e a revista tiñan a súa sede en dependencias cedidas polo Ministerio de Defensa, con teléfonos, ordenadores, etc. A revista recolle ataques continuados á Lei de Memoria Histórica e chamamentos para ocupar militarmente Cataluña polo proceso soberanista. Que facer? A ministra de Defensa, Margarita Robles, non fixo nada ante os manifestos franquistas e golpistas e Felipe VI calou. Estas poderían ser algunhas das actuacións: cese inmediato de militares en activo que asinen manifestos políticos contra o Goberno ou de exaltación do franquismo; impedir que os asinantes deses manifestos poidan utilizar o uniforme militar e retirada dos honores e distincións; ilegalización das fundacións franquistas en cumprimento da Lei de Memoria Democrática, como a Fundación Nacional Francisco Franco, que ten entre os seus obxectivos: "Toda actividade que conduza a enaltecer a figura de Franco"; recollendo a proposta da Asociación Unificada de Militares (AUME), que se tipifique como delito o enxalzamento do golpe de Estado de 1936 e da ditadura franquista.