Aberri Eguna: Bildu aposta por "construír unha República Vasca de iguais" e ensalza Euskal Herria como "nación de liberdade"

Milleiros de persoas participaron este domingo en Iruñea na manifestación convocada por EH Bildu con motivo do Aberri Eguna (Día da Patria Vasca) baixo o lema 'Askatasunaren nazioa gara (Somos a nación da liberdade)'.

A mobilización partiu pasadas as 12.10 horas desde a praza de Europa, onde se foi congregando xente con bandeiras de Nafarroa e ikurriñas. A pancarta co lema 'Askatasunaren nazioa gara' foi portada por membros da Mesa Política de EH Bildu, entre eles o seu secretario xeral, Arnaldo Otegi, as voceiras da coalición nos parlamentos navarro e vasco, Laura Aznal e Pello Otxandiano, e o alcalde de Iruñea, Joseba Asiron.

A marcha enfilou pola avenida Bayona até a praza de Antoniutti, flanqueados ao longo do percorrido por unha multitude de xente que se sumaron despois á marcha. Xa en Antoniutti, instalouse un escenario no que se desenvolveu un acto político no que interviron o secretario xeral de EH Bildu, Arnaldo Otegi, e o alcalde de Iruñea, Joseba Asiron.

"Necesitamos facer fronte aos vellos e aos novos retos"

Otegi afirmou este domingo que "ninguén deterá a loita do pobo vasco por recuperar a soberanía e construír unha República Vasca de iguais" e lembrou quen "combateu o fascismo" e "sacrificaron as súas vidas por este país", en referencia ao 50 aniversario dos fusilamentos no marco da ditadura franquista.

Así mesmo, destacou que "nós nunca utilizaremos o Aberri Eguna para criticar ninguén que defenda que este é un país, que é unha nación, e que ten dereito a decidir. Iso deixámosllo a quen fai do insulto e do barro a súa práctica política". "Hai un campamento base que hai que elevar" e "necesitamos facer fronte aos vellos e aos novos retos", subliñou o líder da coalición abertzale, que tendeu a man "a todos os que consideran que este é un país que merece máis soberanía, recoñecemento nacional, defensa da súa lingua nacional e unha sociedade diferente para construír xuntos ese camiño".

"Fronte aos insultos, máis man tendida; fronte aos desprezos, aquí está a esquerda independentista disposta a xogar unha partida en termos estratéxicos, non en termos tácticos, non no curtopracismo, senón mirando o horizonte que se chama República Vasca de iguais", destacou.

Arnaldo Otegi reivindicou que "este é un país que construíu o seu imaxinario, a súa historia e o seu futuro sobre o esforzo de miles de traballadores e traballadoras, de xentes que souberon manter non só a memoria, senón vivas as nosas bandeiras, o noso idioma nacional e os nosos obxectivos últimos".

Un país, continuou, que "mira ao futuro porque sabe ler en cada momento cales son os intereses das súas maiorías traballadoras e sociais". "Construír unha patria significa construír unha patria que defenda os dereitos das inmensas maiorías populares e traballadoras deste país", remarcou.

O dirixente de EH Bildu afirmou que "soubemos transmitir ás novas xeracións o impulso por un proceso de liberación nacional e social", por iso deu as grazas á mocidade, á que "corresponde seguir o camiño". "Ás non tan novas xeracións énchenos de orgullo e admiración, como diría o Borbón, comprobar que as novas xeracións se unen ao compromiso por construír a República Vasca e por construír un futuro diferente para as xentes que vivimos e traballamos aquí", celebrou.

Otegi recoñeceu que "no pasado non soubemos aproveitar todas as ocasións" mais sinalou que "non debemos facer un repaso sobre quen tivo a responsabilidade de que non fosen aproveitadas". Puxo en valor que "somos un país a escala pequena que fixo grandes cousas" e indicou que "necesitamos saber xogar con intelixencia emocional e con intelixencia política para aproveitar todas e cada unha das ocasións que se nos presentan para avanzar no camiño de conquistar a nosa soberanía nacional e construír un futuro diferente".

Representación do BNG

A deputada nacionalista Montse Prado asistiu ao Aberri Eguna en representación do BNG. "Nun momento no que o gran debate é ou imperialismo ou soberanía dos pobos, o BNG está ao lado das organizacións que defenden o dereito de autodeterminación, o dereito dos pobos a decidir, e faise moi necesario seguir reivindicando o dereito das nacións, neste caso de Euskal Herria, e tamén no caso da Galiza, a facerse donas dos seus destinos e dos seus recursos e construír repúblicas de liberdade entre iguais".