Hai apenas un mes comezaban os traballos de restauración da torre de Meira, en Moaña. Unha actuación que desenvolve o concello do Morrazo, que asinou un convenio coa Comunidade de Montes de Meira, e que consiste nunha nova escavación da zona norte para ampliar as áreas que foran estudadas no ano 1976. No punto onde se acometen as obras localizaríase a suposta porta de acceso á fortaleza.
A obra viu a luz verde na xunta do Goberno local de 21 de setembro de 2020 e o 11 de xaneiro o Concello contratou o proxecto das obras por un importe de 14.786 euros. A Deputación de Pontevedra, a través dunha subvención, asume 11.274 euros e a cantidade restante corre por conta das arcas municipais.
A restauración da torre irá acompañada dunha sinalización que explicará a importancia do enclave e a súa historia.
A orixe
A fortaleza, situada nun promontorio a 140 metros de altitude, constaba dunha torre de vixilancia, un patio de armas, unha muralla e un foxo. Pertenceu ás casas nobiliarias de Meira e Valadares. Foi derrubada polos Irmandiños entre 1467 e 1469.
No lugar atopouse material metálico, cerámico e restos óseos que permanecen depositados no Museo de Pontevedra.
A parroquia de Meira posúe varios conxuntos de petróglifos da Idade de Bronce.