balbela.- Póla que se demouca dunha parra.
Lugar de escoita.- Marcelín-Navia de Suarna.
Fonte.- Fernando/ENDL Navia de Suarna.
birlar.- (Ademais de significados xa rexistrados) Agromar, abrochar, xermolar.
Lugar de escoita.- Concello de Cambre (A Coruña).
Fonte.- Víctor Torreiro García.
cercelos.- Palabra empregada na área da Mariña Lucense para referirse á flor do castaño.
Lugar de escoita.- Sargadelos (Cervo).
Fonte.- Isabel Echevarría Fernández (avoa de Roi Martínez Enríquez).
Outros apuntamentos.- Enviada por Juncal Martínez, do IES Leiras Pulpeiro de Lugo.
chorar.- (Ademais de significados xa rexistrados) Dise cando unha planta ou árbore ten mala cor e parece que vai morrer. Por exemplo, dise dunha árbore que parece que prendeu pero logo ten pouco vigor ou do trigo cando amarelea pero aínda está pequeno.
Lugar de escoita.- Fonteabuín (Sarria).
Fonte.- Parella de María Xosé López Castro.
Outros apuntamentos.- No caso do trigo, o informante indica que se debe a arar a terra mollada ou fóra de sazón.
xaramelo.- Taliño polo cal a semente comeza a medrar para ser planta. Sería, logo así, ese conxunto de partes da graíña (radícula, epicótilo e hipocótilo) que conforman o embrión das plantas.
Lugar de escoita.- Calvos (Cuntis).
Fonte.- Manuela Couso Ares.
Outros apuntamentos.- Enviado por Héitor Picallo. Escoitado tamén a Sandra Carballo, da Asociación Cultural O Xaramelo, en Meis.
