A Mesa denunciará perante o Consello de Europa o veto da Xunta a ‘Nós Diario’ nas axudas aos medios

A Mesa pola Normalización Lingüística anunciou na mañá da sexta feira que recorrerá ao Consello de Europa para denunciar a exclusión de Nós Diario nas axudas aos medios da Xunta da Galiza malia cumprir os criterios da convocatoria de subvencións.

marcos maceira
photo_camera Marcos Maceira, presidente da Mesa.

"Non podemos consentir que os medios en galego fiquen sen as axudas para publicar en galego só por publicaren en galego". Eis a reacción da Mesa pola Normalización Lingüística á información publicada por Nós Diario na que se dá conta do veto da Xunta da Galiza a este medio nas axudas á prensa.

A entidade en defensa do galego anunciou na mañá da sexta feira que porá en coñecemento do Consello de Europa a exclusión de Nós Diario das axudas do Goberno galego aos medios de comunicación malia cumprir os criterios recollidos na convocatoria de subvencións.

A Mesa pon de manifesto que Nós Diario "é o único diario impreso en galego e o único que ficará sen axudas polo uso do galego".

A entidade, da que é presidente Marcos Maceira, expón que o artigo 12 da Carta Europea das Linguas empraza os poderes públicos, entre eles a Xunta da Galiza, a se comprometer a "fomentar e/ou facilitar a creación e/ou mantemento cando menos dun órgano de prensa en lingua minorizada".

A Carta recolle que as autoridades deben "cubrir os custos suplementarios dos medios de comunicación que utilicen as linguas rexionais ou minoritarias, en caso de que a lei prevexa unha asistencia financeira en xeral para os medios de comunicación"

No mesmo artigo, explica A Mesa, a Carta recolle que as autoridades se comprometen a "cubrir os custos suplementarios dos medios de comunicación que utilicen as linguas rexionais ou minoritarias, en caso de que a lei prevexa unha asistencia financeira en xeral para os medios de comunicación"

A este respecto, a asociación advirte de que "nada disto acontece na Galiza". "Os medios en galego sempre fican excluídos". "Non só é incumprimento flagrante dun tratado internacional que a Xunta debe cumprir. É, tamén, inversión do seu contido: faise xustamente o contrario! Así o temos indicado en varios infomes ao Consello de Europa", conclúe A Mesa.

O anuncio da Mesa chega após Nós Diario informar de que o Executivo do Alberto Núñez Feixoo exclúe este medio do reparto de axudas económicas a empresas xornalísticas e de radiodifusión para o ano 2021. Para os xornais editados en papel destínase unha contía total de 1.255.000 euros.

A Secretaría Xeral de Medios da Xunta da Galiza, da que está á fronte Mar Sánchez, desestimou o recurso de reposición presentado por Nós Diario á denegación da solicitude das axudas. Tras tombalo, Sermos Galiza S.A., empresa editora, vén de presentar perante o Tribunal Superior de Xustiza da Galiza (TSXG) un recurso contencioso-administrativo, que xa foi admitido a trámite.

Comentarios