Aulas de lingua e cultura

Alumnado de máis de vinte países estudará galego nos cursos da Academia

De Rusia, Finlandia, Hungría, India, Irán, Madagascar, Romanía, Alemaña, Arxentina, Austria, Brasil, Cuba, República Checa, Inglaterra, Gales, Estados Unidos, Polonia, Italia, Portugal ou Venezuela procede o alumnado que, desde esta terza feira 2 de xullo, aprenderá lingua e cultura galega nos cursos ofertados pola Real Academia Galega.

cursos RAG
photo_camera Imaxe dunha visita á catedral de Compostela nos cursos de lingua e cultura galega da Real Academia Galega. Foto: RAG.

As aulas estenderanse até o 24 de xullo e combinarán “clases teóricas e prácticas sobre o idioma e a cultura de Galiza con palestras, excursións e obradoiros”. Será o presidente da Academia, Víctor Freixanes, o encargado de impartir a conferencia inaugural a quinta feira 4 de xullo na propia sede da institución.

En xornadas sucesivas intervirán o músico e escritor Antón Reixa, a música Paulina Ceremuzynska, a xornalista María Yáñez, o poeta Celso Fernández Sanmartín, o presidente da fundación Rosalía Anxo Angueira, o dramaturgo Quico Cadaval e o arqueólogo Jorge Suárez Otero. Os participantes tamén recibirán, se así o queren, obradoiros de música e baile tradicional.

Os cursos, de nome Galego sen fronteiras, atinxen a súa edición número 32, codirixida polos académicos Henrique Monteagudo e Xosé Lois Regueira. Á organización da Real Academia Galega contribúe tamén o Instituto da Lingua Galega da Universidade de Santiago e apóiano a Deputación da Coruña e a Secretaría Xeral de Política Lingüística da Xunta.

Comentarios