Trabar a historia

Esta sería unha máis das numerosas mostras de recoñecemento público dos seus coetáneos que, ademais, trataban de definir unha personalidade irrepetíbel. Ferrín diría del que era AUTÉNTICO, un dos "grandes protagonistas da resurrección da nosa patria". Fernández Ferreiro cualificouno de ÚNICO e Manolo Rivas elevouno á categoría dun BIG BANG. Díaz Pardo noméao como o "primeiro artista plástico que restauraría o compromiso da arte galega co destino do seu pobo". Bo tempo / Alberto Díaz / Demo editorial / 2020 / 124 páxinas / 20 euros Así poderiamos enxergar liñas e liñas cunha enchente laudatoria de todos cantos coñeceron a un dos maiores innovadores da nosa arte, unha arte sobre a que tan ben teorizou nos seus numerosos escritos. Porén, semella que os antergos eloxios cara ao poliédrico autor foron disipándose paseniño, chegando case a perderse coa entrada do novo século. O motivo aínda non o teño ben claro, mais non me queda a menor dúbida de que chegará o día no que se lle tribute o merecido recoñecemento mentres nos levemos as mans á testa por ter recluído nun místico e absurdo baleiro a súa figura. Como non podía ser doutra maneira, unha das homenaxes máis senlleiras que se lle podían facer ao gran pioneiro da nosa banda deseñada, tal é como xa fixera Xaquín Marín aló polo ano 1988 en A conta atrás, é a de dar vida a Reimundo dentro das propias viñetas. Porén, tentar levar todo o universo vital, artístico e político non é unha tarefa doada. Como sintetizar e secuenciar o "dono do caos"? Pois coa chave deu Alberto Díaz ‘Pelorroto’, que conseguiu enfiar toda esta enerxía cósmica partindo das súas propias vivencias persoais cerca de Patiño, xunto cun intenso traballo de investigación que se peneira en pequenos liscos vitais, brochadas artísticas deitadas contra as páxinas que, como na action painting, deixan a marca esencial e persoal do autor. Desta maneira podemos achegarnos aos fundamentos teóricos ou aos numerosos proxectos artísticos e políticos creados por Reimundo dunha maneira atraente, áxil e eficaz, grazas a unha hábil escolla e tratamento do mundo Patiño no que as propias cores usadas, os símbolos, as metáforas ou a superposición da acción sobre as propias obras do artista conseguen que o goce da lectura se multiplique exponencialmente. Unha obra intelixente e necesaria que, xa alén do seu valor estético, vén a contribuír de maneira significativa á recuperación da memoria de quen ficou, como ben sinalara Novoneyra, "trabando a HISTORIA".