Do tempo e o inesperado

É case unha inercia falar da clásica precariedade da literatura dramática galega e, dentro dela, da peculiar situación do teatro pensado para a xente máis nova. Porén, o certo é que hai realidades que poñen en cuestión moitos destes puntos de partida. Poder falar de Carlos Labraña como un dos máis sólidos autores da literatura infantoxuvenil galega é inherente a destacar como a súa xa longa carreira se construíu tomando como xénero central o teatro para crianzas. E isto só é posíbel pola aposta de editoras que, como Galaxia, manteñen unha acusada sensibilidade cara a este formato, un dos que máis inesperadamente poden achegarse ao público novo. É certo que a relevancia que ten este tipo de teatro presenta aínda moitas carencias, e non sería xusta a comparación con outros xéneros como a narrativa, pero polo menos podemos dicir que hai partido e que á literatura dramática galega aínda lle quedan minutos para seguir demostrando a súa valía. Contra o reloxo / Carlos Labraña (il. de Fonso Barreiro 'Fon') / Galaxia / 2021 / 128 páxinas / 10,70 euros Xustamente de minutos e das formas de medir o tempo é que nos fala esta nova obra de Labraña, unha historia que nos coloca no escenario dunha reloxaría de vila, un espazo tan inspirador como pouco explotado literariamente e que concede á obra unha aura moi especial capaz de rexer todo o seu desenvolvemento. A cuestión do tempo ábrese ás máis variadas interpretacións e conexións con ideas filosóficas complexas. Non podemos dicir que esta dimensión reflexiva sobre o tempo estea completamente ausente na obra, pero si que o que toma as súas rendas son elementos moito máis dinámicos e relacionados coa acción. Lembrando por momentos outras historias teatrais e cinematográficas con enredos que xogan co absurdo e coas situacións disparatadas, Contra o reloxo depáranos un enredo cheo de acontecementos inesperados, sorpresas e malentendidos. Pola reloxaría dun don Pedro que baralla a súa xubilación pasan multitude de personaxes e cousas sorprendentes, incluída a chegada de misteriosos envíos, un intento de roubo e a aparición dun veciño alporizado coas molestias que o negocio lle leva causando dende hai anos. É un fondo que marca a filiación da obra cun teatro dinámico e moi vinculado á acción, pero que non impide que os xogos que resucitan o pasado e alteran o fluír predeterminado dos reloxos poidan tamén facer a súa aparición e supor unha parte importante do contido dunha trama que, por momentos, mesmo pode achegarse á ciencia ficción. Unha historia orixinal e con moitas dimensións capaces de espertar interese e sorpresa.