A Xustiza estadounidense "pon en crise" a política de aranceis de Trump

O “golpe [de Estado] xudicial está fóra de control”, asegurou na madrugada da quinta feira Stephen Miller, un dos asesores do presidente dos Estados Unidos, Donald Trump (Partido Republicano), mentres que Kush Desai, voceiro da Casa Branca, defendeu que “non corresponde a xuíces non electos decidir como abordar adecuadamente unha emerxencia nacional”, e o propio Trump compartiu nas redes sociais unha imaxe que sostén que “está nunha misión de deus”. Pouco antes, o Tribunal de Comercio Internacional estadounidense, con sede en Nova York, anunciara un veredicto que anula a inmensa maioría dos aranceis impostos polo mandatario, após unha denuncia de Liberty Justice Center en nome de cinco pequenas empresas e de 12 dos estados que compoñen o país, todos gobernados polo Partido Demócrata. A sentenza incide en que os gravames son “ilegais” ao non proceder do Congreso, que ostenta esa competencia, vetando a imposición deles por parte de Trump a través da Lei de poderes económicos de emerxencia internacional de 1977, que, detalla, non outorga “autoridade ilimitada” ao mandatario e só se xustifica en caso de “ameazas non usuais e extraordinarias”. Malia que Trump aduciu que o déficit comercial en bens supón unha emerxencia nacional, o certo é que suman 49 anos consecutivos nesta situación. O tribunal fixou un prazo de 10 días para que a Casa Branca implemente a sentenza, que anula desde os aranceis iniciais ao Canadá, México e a China, que Trump xustificou coa chegada de fentanilo deste países, e de persoas migrantes desde os dous primeiros, até os denominados “aranceis recíprocos” á inmensa maioría de territorios do planeta, de entre 10% e 49%, e que quedaran suspendidos até xullo na primeira cifra á espera de que os países afectados asinasen acordos comerciais con Washington. Con todo, a resolución non afecta ás taxas polas importacións de aceiro, aluminio e automóbiles, ao non ser aplicadas por medio da lei de emerxencia. A China e os Estados Unidos limitan 90 días a guerra comercial e pactar un mecanismo de consultas En paralelo, a maxistratura apuntou que Trump mantén poderes limitados no ámbito comercial en base á Lei de Comercio de 1974, que lle permitiría activar aranceis de 15% durante 150 días a países cos que teñan grandes déficits comerciais. A Casa Branca xa anunciou a presentación dun recurso no Tribunal de Apelacións do Circuíto Federal en Washington, e de non prosperar apelará a sexta feira ao Tribunal Supremo, no que en teoría a maioría das e dos xuíces están aliñados con Trump e que en última instancia xa tería que decidir sobre o caso. Non haberá mudanzas inmediatas En todo caso, polo de agora non haberá mudanzas inmediatas e os aranceis terán que seguir sendo aboados na fronteira, ratificou o ex alto cargo da Oficina de Aduanas e Protección Fronteiriza John Leonard á canle BBC, que sinalou que, de non ter éxito a apelación, si que se emitirán as ordes correspondentes aos funcionarios da axencia. Se a decisión é finalmente validada polo Supremo a Administración deberá devolver os aranceis, con xuros, pagados polas empresas até o de agora. Amais de “pór en crise a política comercial do presidente”, o veredicto, sobre o que fica pendente saber se Trump o respectará ou o ignorará, supón que “os socios que negocian intensamente durante o período de pausa arancelaria de 90 días poden verse tentados a pospor as concesións aos Estados Unidos até que haxa maior claridade xurídica”, explicou á axencia AP Wendy Cutler, ex funcionaria comercial do país e vicepresidenta do Asia Society Policy Institute. Isto foi corroborado por Paul Ashworth, de Capital Economics, que avanzou que os países afectados optarán por “agardar e ver” que ocorre a continuación, mais “obviamente desbaratará a tentativa da Administración Trump de fechar rapidamente acordos comerciais”. Andrés Piqueras: "Xa non hai volta atrás ao século XX cando os Estados Unidos eran o hexemón" Asemade, a prensa internacional tamén apunta que isto causará que as empresas nos Estados Unidos, as que teñen que asumir o pago dos aranceis polas mercadorías que importan, se vexan obrigadas a repensar a xestión das cadeas de subministración, abrindo a porta a que aceleren os envíos ante a posibilidade de que eventualmente os aranceis volvan ao nivel anterior. Nese sentido, o analista de Goldman Sachs Alec Phillips considera que, malia que se trata “dun revés para os plans arancelarios da Administración e aumenta a incerteza”, “podería non cambiar o resultado final para a maioría dos principais socios comerciais dos Estados Unidos”. Desde a China, a voceira do Ministerio de Comercio, He Yongqian, demandou a Washington “cancelar completamente os aranceis unilaterais inxustificados” e “escoitar as voces racionais da comunidade internacional”. Os aranceis impostos por Trump son tanto un fin, acabar co paradigma liberal que os Estados Unidos impuxeron para o seu beneficio, como unha medida de presión centrada sobre todo en favorecer as condicións de exportación dos seus produtos e tratar de limitar o comercio de terceiros países coa China, que elevou as súas exportacións globais á vez que o déficit comercial dos Estados Unidos medraba tras a aplicación das taxas. Ao respecto, o primeiro acordo comercial fechado, co Reino Unido, recolle que Washington manterá un arancel de 10% á maioría dos seus produtos, a pesar do que Londres se comprometeu a diminuír ou eliminar as barreiras comerciais non arancelarias e a facilitar aínda máis as importacións de mercadorías procedentes do país norteamericano. Musk abandona o Departamento de Eficiencia Gobernamental O multimillonario Elon Musk, que até o de agora encabezaba o Departamento de Eficiencia Gobernamental estadounidense, anunciou na madrugada da quinta feira que o seu tempo na entidade “chega á súa fin”, e un funcionario da Casa Branca transmitiu a Reuters que a súa marcha ten efecto inmediato. Pouco antes, comunicara a súa “decepción” co proxecto de lei de gastos impulsado por Trump, que “aumenta o déficit orzamentario, non o reduce”, culminando co progresivo afastamento do mandatario, a cuxa campaña e a doutros candidatos republicanos achegou arredor de 260 millóns de euros, e despois de enfrontarse a varios altos cargos da Administración, con énfase no referente aos aranceis, que rexeita, e chegando a definir como “máis parvo que un saco de ladrillos” Peter Navarro, asesor comercial de Trump e un firme defensor dos gravames. Radiografía das exportacións aos EUA: cales son os sectores produtivos galegos máis vulnerábeis aos aranceis dos Estados Unidos? Ademais, a súa actuación á fronte dun organismo centrado en recortar gasto, o que non afectou aos contratos de varias das súas empresas coa Administración, e a súa defensa de candidaturas de extrema dereita en eleccións no territorio europeo desencadearon tanto ataques contra concesionarios e coches de Tesla, unha das súas compañías, como unha caída nas ventas da marca, cuxos beneficios caeron 71% no primeiro trimestre deste ano. Os resultados da súa xestión tamén ficaron lonxe das súas metas, pois dos aproximadamente 1,75 billóns de euros que prometeu recortar apenas logrou 154.000 millóns segundo o departamento, dato que non foi confirmado por fontes independentes.