Washington compartirá a súa tecnoloxía punta con Camberra para frear a China

Anthony Albanese, primeiro ministro australiano, e os seus homólogos británico, Rishi Sunak, e estadounidense, Joe Biden, reuníronse a segunda feira en San Diego, nos Estados Unidos (EUA), para debater a implementación do acordo de seguridade trilateral Aukus, e no que está previsto que Camberra anuncie a compra aos EUA de até cinco submarinos de ataque e propulsión nuclear da clase Virxinia nunha primeira fase. A adquisición formaría parte dun plan a longo prazo que convertería o país oceánico en socio da tecnoloxía nuclear secreta que Washington só estaba disposto a compartir até o de agora con Londres, “nun grande impulso contra as ambicións de China no Indo-Pacífico”, destaca Reuters, que o define como “plan anti China”. Amais da compra de tres submarinos estadounidenses a comezos de 2030, con opción a dous máis se é preciso, os EUA despregarán desde 2027 submarinos en Australia de forma rotatoria, co fin de desenvolver a formación das tripulacións australianas e garantir un efecto disuasorio, defenden funcionarios gobernamentais dos EUA. Con vistas á década de 2040, Camberra faríase con submarinos nucleares que están sendo deseñados polo Reino Unido a partir da clase Astute, e que serían ensamblados en Adelaida con tecnoloxía estadounidense, xerando -insiste o Goberno- arredor de 20.000 postos de traballo nas vindeiras tres décadas. “É unha cuestión de postos de traballo”, reiterou Albanese na defensa dun proxecto cun investimento estimado de máis de 60.000 millóns de euros. Asemade, o australiano The Daily Telegraph abriu a porta a que o pacto tamén inclúa mísiles hipersónicos para “aumentar as defensas” antes da chegada dos submarinos nucleares, malia que os EUA aínda están a investigar e probar esta tecnoloxía. En Australia, e despois de que o acordo orixinal fora asinado en 2021 polo Executivo conservador, e profundado ao chegar o laborista Albanese ao poder tras as críticas que lle dedicou cando estaba na oposición, a prensa advirte de que os estaleiros estadounidenses trasladaron a falta de capacidade para asumir o pedido, ou das “preocupacións sobre posíbeis atrasos e aumento de custos” pola produción no país de submarinos que aínda se están a deseñar, sostén The Sydney Morning Herald. Pola súa parte, nos Estados Unidos salientaron as dúbidas sobre o encaixe do acordo nos “estritos límites sobre compartir a tecnoloxía necesaria para o proxecto e sobre o tempo que levará entregar os submarinos”, incide AP. "Grave risco de proliferación nuclear" Perante a inminencia da intensificación da colaboración no marco do Aukus, o Ministerio de Asuntos Exteriores da China reclamou aos tres países que abandonen a “mentalidade de Guerra Fría”, e destacou que para o país asiático o pacto representa un “grave risco de proliferación nuclear”. Nese sentido, fixo fincapé en que a transferencia de materiais de armas nucleares dun Estado con esas armas a un Estado que non as ten constitúe unha violación “descarada” do espírito do Tratado de Non Proliferación Nuclear, o que foi cuestionado polo Executivo australiano, que aseverou que os submarinos non contarán con armas dese tipo. Os submarinos, que terán unha tripulación conxunta entre os tres países, permitirán a Australia converterse no primeiro país con esta tecnoloxía que non conta con armas nucleares. Os Estados con esta clase de submarinos, cunha maior autonomía, son os Estados Unidos, Rusia, a China, o Reino Unido, Francia e a India. Ao tempo, amais da compra, Albanese, Sunak e Biden debateron a coordinación da súa estratexia internacional, con Australia como un dos poucos países no mundo fóra da Organización do Tratado do Atlántico Norte que se pregou ás sancións coercitivas e outras medidas impulsadas por Washington contra Rusia pola guerra de Ucraína. En relación aos obxectivos a longo prazo do Aukus, Londres apuntou que a alianza con Camberra e Washington no Indo-Pacífico é unha das pezas chave da súa estratexia, poñendo o foco na “ameaza” da China e afirmando que buscan “un enfoque consistente, coherente e sólido” que estea “aliñado cos nosos aliados”, no contexto das mensaxes lanzadas nas últimas semanas desde Washington para reducir a relación comercial alertando da dependencia co país asiático. O Indo-Pacífico por riba da UE En setembro de 2021, o anuncio do pacto de seguridade entre os tres países, que incluía un compromiso para axudar Australia a adquirir submarinos nucleares, amosou a determinación estadounidense de fixar o seu foco principal de interese no Indo-Pacífico incluso en detrimento da Unión Europea. O entendemento supuxo a cancelación inmediata dun contrato entre Australia e Francia para que o primeiro comprase unha flota de submarinos ao segundo por valor de 56.000 millóns de euros, definido como unha “puñalada nas costas” polo Gabinete de Emmanuel Macron, e que derivou na chamada a consultas dos embaixadores en Washington e Camberra. Mentres, o bloque comunitario non foi informado nin consultado sobre o acordo. Os EUA inician os exercicios militares con Filipinas Máis de 3.000 soldados das Forzas Armadas de Filipinas e dos Estados Unidos participan nunhas manobras militares conxuntas que comezaron a segunda feira na base militar de Fort Magsaysay, a máis grande do país asiático. Os exercicios prodúcense apenas un mes despois do acordo para que os militares estadounidenses teñan un maior acceso ás bases militares do arquipélago, asinado polo presidente Ferdinand Marcos Jr., fillo do ditador do mesmo nome e que se aproximou a Washington tras o distanciamento no Goberno de Rodrigo Duterte. Este pacto responde ao achegamento dos EUA a países da contorna, Estados que recalcan aínda así que isto non implica un afastamento de Beijing. "Cercar e conter a China" “Esas medidas forman parte dos esforzos de Washington por cercar e conter a China”, ratificou a embaixada chinesa en Manila, acusando o país de unicamente querer “asegurar a súa hexemonía e os seus intereses xeopolíticos egoístas”. En paralelo, alertou de que aliñarse cos EUA “prexudicará gravemente os intereses nacionais filipinos e porá en perigo a paz e a estabilidade rexional”, incidindo en que os militares estadounidenses “veñen desde o outro lado do Pacífico para crear problemas no mar da China Meridional”.