"Viva o glorioso Exército Vermello!": Robert Fico defende a súa asistencia ao Día da Vitoria e rexeita o "novo pano de aceiro"
O primeiro ministro de Eslovaquia, Robert Fico, denunciou os intentos da Unión Europea (UE) de silenciar a verdade histórica e minimizar o papel do Exército Vermello e o pobo soviético na derrota do fascismo e a vitoria na Segunda Guerra Mundial ante o eixo liderado pola Alemaña nazi, nunha guerra que golpeou duramente a Unión Soviética.
Fico visitou esta terza feira o cemiterio dos soldados do Exército Vermello en Michalovce, no leste de Eslovaquia, para render homenaxe aos liberadores do seu país e conmemorar o 80 aniversario do fin da Segunda Guerra Mundial.
"Direino con sinceridade e sen exaxerar. Alégrame moito estar entre xente normal. Non é frecuente que teñamos esta oportunidade de estar con persoas que saben exactamente o que aconteceu entre 1941 e 1945", declarou o primeiro ministro de Eslovaquia.
Ao subliñar que no seu país aínda queda "memoria, orgullo e respecto polo Exército Vermello", o primeiro ministro eslovaco dixo recibir ameazas e advertencias de castigos pola súa decisión de ir a Moscova para as celebracións do Día da Vitoria sobre a Alemaña nazi.
"E que ten que ver a celebración do 80 aniversario do fin da Segunda Guerra Mundial, no país que levou a peor parte, co que está a ocorrer hoxe?", preguntou, convidando a todos a lembrar as palabras dos soldados do 1º Corpo do Exército Checoslovaco, baixo liderado de Ludvík Svoboda (1895-1979).
"Dixeron: 'Percorremos a pé centos de pobos da antiga Unión Soviética. Vimos nenos empalados en valos metálicos, lanzados a pozos. Vimos atrocidades que ninguén vería nin en soños'. Isto é o que se supón que debemos esquecer? En nome de quen ou de que? En nome de que alguén inventou un novo pano de aceiro?", afirmou Fico.
"Rexeito este novo pano de aceiro", continuou o primeiro ministro de Eslovaquia, expresando o desexo de que a súa presenza o 9 de maio nas celebracións en Moscova, "onde estas celebracións, naturalmente, teñen que ter lugar", sexan unha manifestación da súa oposición á confrontación directa con Rusia.
"Gritemos todos xuntos: Viva a República Eslovaca! Viva o glorioso Exército Vermello!", exclamou. En referencia ás frecuentes críticas de quen se indigna cando se recoñece o mérito histórico dos soldados soviéticos, Fico expresou: "A quen debería gritar gloria? Ao Exército australiano, ao Exército finlandés, ao Exército africano? Á fin e ao cabo, foi o Exército Vermello. Non deixemos que a verdade histórica se nos borre da cabeza".
