Vilaplana afirma que non percibiu présa en Mazón na súa comida o día da DINA: Despedíronse falando de fútbol

A xornalista Maribel Vilaplana afirmou á xuíza que investiga a xestión da catastrófica DINA do pasado 29 de outubro de 2024 que, durante a comida de traballo que mantivo ese día co xa ex presidente da Generalitat Valenciana Carlos Mazón, este non mostraba "présa" e que, de feito, despedíronse ás 18.45 horas —cando xa había falecidos pola riada— falando de fútbol. Tamén dixo que Mazón estaba comunicado e que "atendía o seu teléfono móbil", "falaba e tamén escribía".

Vilaplana pronunciouse nestes termos esta segunda feira na súa declaración, en calidade de testemuña, no Xulgado de Instrución número 3 de Catarroja, órgano que investiga a xestión da DINA que deixou 229 vítimas mortais, ademais de cuantiosos danos persoais e materiais.

A comunicadora estaba citada no xulgado ás 9.30 horas aínda que se presentou media hora antes, ás 9.03 horas, coa cabeza baixa e sen facer ningunha declaración á nube de xornalistas que a esperaban na porta. Tamén se atopaba un home que perdeu a súa nai o día da riada, quen lle mostrou a súa foto e lle pediu que "diga a verdade".

Ao comezo da súa declaración, a xuíza instrutora pediulle a Vilaplana o billete do aparcadoiro onde deixou o coche o día da DINA e ao que, segundo desvelou recentemente, a acompañou Mazón tras a comida de traballo. A xornalista non puido achegalo ao afirmar que non dispuña do mesmo, co que a maxistrada reclamarao ao seu banco e á empresa que xestiona o aparcamento.

Seguidamente, a xornalista foi describindo a comida que mantivo co xa ex presidente, que se prolongou durante catro horas, desde as 15 até as 18.45 horas. Comentou que no transcurso da comida Mazón recibía chamadas no seu móbil, "levantábase e atendíaas", dixo. Tamén sinalou que lle entregaron un sobre con documentos que asinou.

Así, a comunicadora indicou que o ex presidente non estaba incomunicado ese día, debido a que "falaba e escribía polo móbil", pero indicou que non lembra o ton ou son do seu teléfono. "Apartábase cando lle soaba o móbil", dixo, ao que ela preguntáballe se quería que se retirase, pero el respondíalle que non se preocupase.

"Eu teño a percepción de escoitarlle falar pouco. El estaría máis escoitando que falando", comentou, para agregar que non lle comentaba "nada" das conversacións que mantiña. "Nunca me comenta nada nin oio palabras como DINA, Cecopi ou chuvas", apostilou.

Preguntada por un vídeo que recibiu no seu móbil sobre as 17.30 horas no que aparecía Utiel (València) asolagado, a comunicadora lamentou que "está sendo utilizada". Indicou que o recibiu nun chat familiar, que se trataba dunha ligazón que lle pasou o seu ex marido, que non abriu. Puxo unha emoticona de sorpresa. "Atorméntame non abrir esa ligazón porque se o vise antes, diría... 'recoiro'", sinalou. Indicou que cre que mirou a mensaxe familiar nunha das ocasións nas que Mazón se levantou da mesa.

"Como se non pasase nada"

Neste momento, a xornalista indicou á xuíza que se pregunta polo motivo polo que Mazón "puido seguir con normalidade" a comida, polo feito de que seguise falando con ela e continuase como se non pasase nada.

A este respecto, Vilaplana sinalou que a actitude de Mazón durante a comida era "distendida" e asegurou que non percibiu "présa" nel. De feito, explicou que cando saíron do restaurante e se dirixiron ao aparcadoiro, ela, que traballa para o Levante, pediulle que fora ver un partido de fútbol, un derbi contra o Elx.

Nese momento, dixo, paseaban "con normalidade". Sinalou que ela non tiña présa e que tampouco tiña a sensación de que Mazón a tivese, co que seguiron falando de fútbol.

Unha vez no aparcadoiro, a xornalista comentou que tivo que ir ao seu coche para recoller o billete e logo foi ao caixeiro para pagar, e tardaría uns cinco minutos. Preguntada por se escoitou o nome de Pradas na súa comida con Mazón, dixo que non o lembraba.