O tribunal da ONU ordena a Israel "deter inmediatamente" o ataque a Rafah polas súas "obrigas baixo a Convención sobre Xenocidio"

A Corte Internacional de Xustiza (CIX), o órgano xudicial principal da Organización das Nacións Unidas (ONU), sentenciou a sexta feira que “Israel debe deter inmediatamente a súa ofensiva militar e calquera outra acción na gobernación de Rafah que poida infrinxir ao grupo palestino en Gaza condicións de vida que poderían provocar a súa destrución física total ou parcial”, todo isto en base ás “obrigas baixo a Convención sobre Xenocidio”. Na decisión, que chega a raíz da demanda de Suráfrica contra o réxime de apartheid sionista por xenocidio, tras a que o país africano efectuou dúas peticións máis de medidas provisorias, o tribunal reiterou que o 26 de xaneiro xa determinou que “Israel debe tomar medidas efectivas para garantir o acceso sen obstáculos á Faixa de Gaza de calquera comisión de investigación, misión de investigación ou calquera outro ente de investigación encargado polos órganos competentes da ONU para investigar denuncias de xenocidio”. Nesa xornada e no seu auto do 28 de marzo, insistiron as e os maxistrados ante a “catastrófica situación en Gaza”, resolvera que a axuda humanitaria e outros servizos básicos tiñan que ser proporcionados “sen obstáculos e a grande escala” no enclave palestino, detallando que iso require que “o demandado manteña abertos os puntos de cruce, en particular o cruce [fronteirizo] de Rafah”, o paso situado nos lindes con Exipto e fechado desde que Israel o asaltou. Nun mes, o Goberno de ultradereita israelí ten que presentar un informe que enumere as medidas adoptadas para cumprir estas ordes xudiciais, que derivan do “risco adicional dun prexuízo irreparábel” contra o pobo palestino de Gaza. Desde o 7 de maio, cando Israel desatou o asalto da gobernación horas despois de que a organización palestina Hamás aceptara un acordo de alto o fogo, avanzando despois cara ás áreas densamente poboadas da cidade, aproximadamente 815.000 persoas foron forzadas a fuxir en dirección a outras partes da Faixa, áreas rodeadas por toneladas de lixo perante o colapso dos servizos públicos polos bombardeos indiscriminados e o intento de invasión israelí e sen apenas acceso a auga ou hixiene no medio da fame masiva que se está a espallar no enclave. A Corte Internacional de Xustiza, "consciente da traxedia humana", ordena a Israel que evite o xenocidio en Gaza Arredor de 75% dos 2,3 millóns de habitantes da Faixa chegaran a Rafah escapando precisamente dos ataques israelís. Un dos lugares aos que se están a dirixir é Khan Younis, unha cidade na que “non hai onde ir”, “camiñei por esas rúas e non está un pouco destruída, está completamente devastada”, explicou James Elder, voceiro do Fondo da ONU para a Infancia (Unicef), nun conxunto de feitos que a CIX define como “excepcionalmente graves”. A pesar diso, desde Israel insístese en que esta fuxida é unha “evacuación”, xustificándoo en que, por este motivo, os Estados Unidos, que ameazaran con limitar as entregas de armas a Israel se atacaba as áreas poboadas de Rafah, cualifican agora a ofensiva militar como “selectiva e limitada”. Con todo, Nawaf Salam, presidente da CIX, subliñou que “o tribunal non está convencido” de que as supostas medidas implementadas por Israel “sexan suficientes para aliviar o inmenso risco que corre a poboación palestina”, nunha situación “desastrosa” a nivel humanitario que se “deteriorou aínda máis” desde a súa orde anterior. Naledi Pandor, a titular de Exteriores surafricana, celebrou a decisión, remarcando que “é un conxunto de medidas provisorias moito máis forte”, e Nabil Abu Rudeina, voceiro da Presidencia da Autoridade Nacional Palestina, destacou que escenifica o consenso internacional para a fin da agresión militar israelí contra Gaza, que para persoas expertas da ONU é un xenocidio. Israel contesta bombardeando Rafah Desde o Executivo sionista, o ministro de Seguridade Nacional, Itamar Ben Gvir, proclamou que o “noso futuro non depende do que dirán os xentís [persoas non xudías], senón do que farán os xudeus”, constatando o carácter relixioso do réxime de apartheid. O certo é que pouco despois de facerse público o auto da CIX Israel intensificou os seus ataques aéreos contra Rafah, bombardeando o campo de refuxiados de Shaboura. Netanyahu convocou unha reunión cun grupo reducido de ministros e o asesor xurídico do Goberno para discutir os seguintes pasos, entre reportes de contactos cos seus socios estadounidenses. Suráfrica reitera ao tribunal da ONU que debe frear o xenocidio en Gaza e denuncia a "impunidade institucionalizada" Aínda que Israel xa ignorou unha resolución do Consello de Seguridade da ONU que exixía un alto o fogo, o que se enmarca na cobertura diplomática que lle brinda Washington, a decisión da CIX segue a ampliar a fenda entre os países occidentais, cada vez máis reticentes a avalar a posición dos Estados Unidos, que se abriu esta semana coa decisión da Fiscalía da Corte Penal Internacional de pedir ordes de detención contra Netanyahu e o ministro de Defensa, Yoav Gallant -así como líderes de Hamás-, por crimes de guerra e contra a humanidade, e co recoñecemento de Palestina por parte do Estado español, Irlanda e Noruega. “Teremos que elixir entre o noso apoio ás institucións internacionais e ao Estado de dereito ou o noso apoio a Israel”, admitiu Josep Borrell, alto representante de Exterior da Unión Europea. O réxime israelí, sen apenas "marxe de manobra" O xuíz israelí no caso da CIX, Aharon Barak, tratou de argumentar que a determinación do tribunal implica que Israel pode continuar coa ofensiva en Rafah “sempre que cumpra coas súas obrigas en virtude da Convención do Xenocidio”, o que se agarda sexa a posición oficial do Ministerio de Xustiza, adianta o xornal The Times of Israel, e o Ministerio de Exteriores difundiu un comunicado conxunto co Consello de Seguridade Nacional sionista no que, ademais de criticar a resolución por “falsa, escandalosa e repugnante”, sostén que actúa en base ao dereito internacional. Así e todo, o fiscal dedicado a crimes de guerra Reed Brody corrobora que “son ordes moi específicas”, polo que “non hai moita marxe de manobra” para Israel. Brody fixo énfase na “tenacidade e perseveranza de Suráfrica”, que logrou que o tribunal respondera “case unanimemente [13 de 15], incluídos todos os xuíces occidentais, que realmente foron tan radicais como a realidade”. Case 36.000 palestinas e palestinos, arredor de 40% crianzas, foron asasinadas por Israel desde outubro, causando á vez feridas a máis de 80.000 persoas, nunha agresión na que foron atacados de forma repetida hospitais, escolas, campos de refuxiados ou convois de axuda humanitaria.