Suecia é o primeiro membro da UE en recoñecer Palestina como estado
“Agardamos que outros continúen por este camiño”, dixo Margot Wallström, ministra de Exteriores. Son xa 135 países os que recoñecen o Estado palestino. Israel retira o seu embaixador de Estocolmo.
Suecia foi esta quinta feira no primeiro membro da Unión Europea en recoñecer o estado palestino, unha decisión que o goberno de centro-esquerda sueco cualificou de “acto de responsabilidade” para impulsar o proceso de paz. Israel xa tildou o recoñecemento de provocación e procedeu a retirar o seu embaixador en Estocolmo. Stefan Lofven, xa anunciara na súa toma de posesión que Suecia ía recoñecer o estado palestino, gañándose así as críticas de Israel e Estados Unidos.
O executivo nórdico defende a súa decisión e anunciou que aprobaba un incremento do 50% na axuda económica a Palestina, que pasa ser de 161 millóns de euros. A ministra de Exteriores, Margot Wallström aclarou que o recoñecemento de Palestina partía de que “se cumpren os criterios de dereito internacional para recoñecer estados”.
'Tack, Sverige'
Wallström negou que a decisión fose “precipitada”, mesmo entendeu que “o risco é que chega máis ben tarde”, e incidiu en que hai que enviar un “sinal de que cremos na solución dos dous estados e de que o mundo non esquece” o pobo palestino. Con Suecia, son xa 135 os estados que deron o paso de recoñecer a Palestina como estado independente. Unha decisión que foi acollida con ledicia entre as e os palestinos. ‘Tack, Sverige’ (Grazas, Suecia) foi o lexendado que encheu balcóns en Ienin, Belén, Xerusalén, Gaza, Nablús...